އ.ދ ގެ އާންމު މަޖިލީހުގައި ތަގުރީރު ކުރައްވަން ވަޑައިގެންނެވުމަށް ވުރެ އިސްކުރެއްވީ ހައްޖުގެ އަޅުކަން އަދާކުރެއްވުމަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޔާމީން މިހެން ވިދާޅުވެފައިމިވަނީ އެމަނިކުފާނު އ.ދ އަށް ވަޑައިނުގެންނެވީ ކަންނެތް ކަމުން ކަމަށް ބާރަށު ދާއިރާ ޕީއެންސީ މެމްބަރު އިބްރާހިމް ޝުޖާއު ވިދާޅުވެފައިވަނިކޮށެވެ.
ޕީއެންއެފް އޮފީހުގައި ރޭ ބޭއްވި ޖަލްސާގައި ޔާމީން ވަނީ އެމަނިކުފާނުގެ ވެރިކަމުގެ ފަސް އަހަރު އ.ދ އަށް ވަޑައިނުގެންނެވުނު ސަބަބުތައް ހާމަކުރައްވާފަ އެވެ.
ޔާމީން ވިދާޅުވީ ވެރިކަމުގެ ފުރަތަމަ ދައުރު އ.ދ ގެ އާންމު ޖަލްސާ ބޭއްވީ ހައްޖު ދުވަސްވަރު ކަމަށާއި އެ ދެ ކަންތަކުން އެމަނިކުފާނު އިސްކުރެއްވީ ހައްޖުގެ އަޅުކަން ކަމަށެވެ. އަދި ދެވަނަ އަހަރު އ.ދ އަށް ވަޑައިގެންނެވުމުގެ ކުރިން ހައްޖަށް ވަޑައިގެންނެވުމަށްފަހު އެނބުރި ރާއްޖެ ވަޑައިގެންނެވި ތަނުން ބޮމުގެ ހާދިސާ ހިނގީ ކަމަށާއި އެއާއެކު އ.ދ އަށް ދިޔުމަށް ވުރެ މުހިއްމުވީ ރާއްޖެ ހަމަޔަކަށް އެޅުވުން ކަމަށްވެސް ޔާމީން ވިދާޅުވި އެވެ.
އޭގެފަހުން އެމަނިކުފާނަށް އެކި ގޮތްގޮތުން ދަތިތައް އެޅުވުމުގެ މަސައްކަތްތައް ވެސް ހިނގި ކަމަށާއި އެފަދަ އެއްވެސް ކަމެއް ރައީސް ޑރ. މުހައްމަދު މުއިއްޒަށް މިހާތަނަށް ކުރިމަތިވެފައި ނުވާ ކަމަށް ޔާމީން ވިދާޅުވި އެވެ. އ.ދ އަށް ކުރާ ދަތުރަކީ ހަރަދު ބޮޑު ދަތުރެއް ކަމަށާއި އެތަނުގައި ވާހަކައެއް ދެއްކިޔަސް އެ އަޑުއަހައިގެން ގައުމެއްގެ ރައީސަކު ކަމެއްވެސް ކޮށްނުދޭނެ ކަމަށް ޔާމީން ވިދާޅުވި އެވެ.
ޔާމީންގެ ވެރިކަމުގައި ރާއްޖެއިން އދ. ގައި ތަގުރީރު ކުރައްވާފައި ވަނީ މުޅިން ވެސް ޔާމީން ކަނޑައެޅުއްވެވި މަންދޫބެން ނެވެ. އދ. ގައި ޔާމީން ތަގުރީރު ކުރައްވާފައި ނުވާތީ އެމަނިކުފާނުގެ ވާދަވެރިން ވަރަށް ބޮޑަށް ފާޑުކިޔުންތައް އަމާޒުކުރެ އެވެ.