އިޒްރޭލުން ލުބްނާނުގެ ދެކުނުގެ ސަރަހައްދުތަކަށް އިއްޔެ ދިން ވައިގެ ހަމަލާތަކުގައި މަރުވި މީހުންގެ އަދަދު 400 އަށް ވުރެ މައްޗަށް އަރައިފި އެވެ.
ލުބްނާނުގެ ހެލްތު މިނިސްޓްރީން ބުނީ އިއްޔެ ހެނދުނު އިޒްރޭލުން ދިން ހަމަލާތަކުގައި މަރުވި މީހުންގެ އަދަދު 492 އަށް އަރާފައިވާ ކަމަށާއި އޭގެތެރޭގައި 35 ކުޑަކުދިންނާއި 58 އަންހެނުން ހިމެނޭ ކަމަށެވެ. މި ހަމަލާތަކުގައި ޒަހަމްވި މީހުންގެ އަދަދު ވަނީ 1،645 އަށް އަރާފަ އެވެ.
މި ހަމަލާތަކާ ގުޅިގެން ގިނަ އަދަދެއްގެ ބަޔަކު ގެދޮރު ދޫކޮށް އެހެން ހިސާބުތަކަށް ގޮސްފައިވާ ކަމަށްވެސް ހެލްތު މިނިސްޓްރީން ބުނެ އެވެ.
އިޒްރޭލުން ބުނާގޮތުން ހަމަލާތައް އަމާޒުކުރީ ލުބްނާނުގެ ހިޒްބުﷲ ޖަމާއަތުން އުޅޭ ސަރަހައްދުތަކަށެވެ.
މި ހަމަލާތަކުގެ ރައްދުގައި ހިޒްބުﷲ އިން ވެސް އަންނަނީ އިޒްރޭލުގެ އުތުރާއި ދެކުނުގެ ބައެއް ސަރަހައްދުތަކަށް ވައިގެ ހަމަލާތައް ދެމުންނެވެ.
އިޒްރޭލާއި ހިޒްބުﷲ އިން ހަމަލާތައް ބަދަލުކުރަމުންދާއިރު، މިދިޔަ ހަފްތާގައި ހިޒްބުﷲ މެންބަރުންގެ ޕޭޖަރުތައް ގޮވުމުގެ ހާދިސާތަކެއް ވެސް ހިނގާފައިވެ އެވެ. ހިޒްބުﷲ އިން ވަނީ މިއީ އިޒްރޭލުން ދުރާލައި ރާވައިގެން ދީފައިވާ ހަމަލާއެއް ކަމަށް ތުހުމަތުކޮށްފަ އެވެ. މި ހަމަލާތަކުގައި 37 މީހަކު މަރުވެފައިވާއިރު، 287 މީހަކު ތިބީ ސީރިއަސް ހާލަތުގަ އެވެ.
މި ހަމަލާތަކާ ގުޅިގެން އިޒްރޭލަށް ހަރުކަށި އަދަބެއް ދޭނެ ކަމުގެ އިންޒާރު ހިޒްބުﷲ ޖަމާއަތުގެ ވެރިޔާ ހަސަން ނަސްރުﷲ ވަނީ ދެއްވާފަ އެވެ.