އޮސްޓްރޭލިއާ ސަރުކާރާއި އެމްއެންޑީއެފްއާ ދެމެދު ބޭއްވި ފުރަތަމަ "ޑިފެންސް ޕޮލިސީ ޓޯކްސް" އިއްޔެ ބާއްވައިފި އެވެ.
ބަންޑާރަކޮށީގައި އެ މަޝްވަރާ ބައްދަލުވުމަކީ ކަނޑުގެ ސަލާމަތާއި ރައްކާތެރިކަމާއި، ޕްރޮފެޝަނަލް އަސްކަރީ ތަޢުލީމް ފޯރުކޮށް ދިނުމާއި، މަޢުލޫމާތު ބަދަލުކުރުމާއި، ދިފާއީ ދާއިރާއާ ގުޅުންހުރި ހުނަރުތަކުގެ ތެރެއިން ކެޕޭސިޓީ ބިލްޑިން ފަދަ މުހިންމު ދާއިރާތަކުން ދެ ޤައުމުގެ އެއްބާރުލުން އިތުރުކުރުމުގެ މަޤުޞަދުގައި ފެށި މަޝްވަރާތަކެކެވެ.
ސިލްސިލާކޮށް ކުރިއަށް ގެންދަން ނިންމާފައިވާ މި މަޝްވަރާތަކުގެ ފުރަތަމަ ބައްދަލުވުމުގައި ދިވެހި އަސްކަރިއްޔާގެ ފަރާތުން ބައިވެރިވެވަޑައިގަތް ވަފުދުގެ އިސްވެރިޔަކަށް ހުންނެވީ ވައިސް ޗީފް އޮފް ޑިފެންސް ފޯސް، ބްރިގޭޑިއާ ޖެނެރަލް އަޙްމަދު ޣިޔާޒް އެވެ.
ބައްދަލުވުމުގައި އޭނަ ވަނީ ދެ ޤައުމުގެ އަސްކަރީ ގުޅުން އިތުރަށް ބަދަހިކުރުމުގެ މުހިންމުކަން ފާހަގަކުރައްވައި، އެމްއެންޑީއެފްގެ ޤާބިލުކަން ކުރިއެރުވުމަށް އޮސްޓްރޭލިއާއިން ވެދެއްވާ އެއްބާރުލުމަށް އަލިއަޅުއްވާލައްވައިފަ އެވެ. އަދި ޚާއްޞަކޮށް ޤައުމީ ކުއްލި ހާލަތްތަކާއި ޤުދުރަތީ ކާރިސާތަކުގައި ރާއްޖެއަށް އެހީތެރިވުމުގައި އޮސްޓްރޭލިއާ ސަރުކާރުން ވެ ދީފައިވާ އެހީތެރިކަން ފާހަގަކުރައްވައި ޝުކުރު ވެސް އަދާކުރެއްވި އެވެ.
މި މަޝްވަރާތަކުގައި އޮސްޓްރޭލިއާގެ ވަފުދުގެ އިސްވެރިއަކަށް ހުންނެވީ އޮސްޓްރޭލިއާގެ ޑިޕާޓްމަންޓް އޮފް ޑިފެންސްގެ ނޯތު އެންޑް ސައުތު އޭޝިއާ ބްރާންޗްގެ އެސިސްޓެންޓް ސެކްރެޓަރީ، މިސް ކެރެން ރެޑްފޯޑް އެވެ. އެކަމަނާގެ ވާހަކައިގައި، ރާއްޖޭގެ ދިފާޢީ ދާއިރާގެ ތެރޭގައި ކެޕޭސިޓީ ބިލްޑިން އާއި ސްކިލް ޑިވެލޮޕްމަންޓަށް އަމާޒުކޮށްގެން ހިނގަމުންދާ ޕްރޮގްރާމްތައް ފުޅާކުރުމުގެ މުހިންމުކަން ފާހަގަކުރެއްވި އެވެ.
އިއްޔެ ފެށި ޑި"ފެންސް ޕޮލިސީ ޓޯކްސް" އަކީ ޚާއްޞަކޮށް ސަރަހައްދީ ކަނޑުގެ ސަލާމަތާއި، ތަމްރީނު ޕްރޮގްރާމްތައް އިތުރުކުރުމާއި، ދިފާޢީ މަޢުލޫމާތު ހިއްސާކުރުން ފަދަ ދާއިރާތަކުން ކުރިއަށް އޮތް ތަނުގައި އެއްބާރުލުން ދިނުމާ ބެހޭ ގޮތުން މަޝްވަރާކުރުމަށް ހުޅުވާލެވުނު މަންސައަކަށް ވާނެ ކަމަށް އެމްއެންޑީއެފުން ބުންޏެވެ.