ރާއްޖޭގެ އެކި ހިސާބުތަކުގައި މިސްކިތް ބިނާކުރުމުގެ ގޮތުން މި އަހަރުގެ މިހާތަނަށް އަމިއްލަ 9 ފަރާތަކަށް ހުއްދަ ދީފައިވާ ކަމަށް އިސްލާމިކް މިނިސްޓްރީން ބުނެފި އެވެ.
މީގެ ތެރެއިން 5 މިސްކިތެއް މާލެ ސަރަހައްދުގައި ބިނާކުރާ އިރު، އަނެއް ހަތަރު މިސްކިތަކީ އަތޮޅުތެރޭގައި ބިނާކުރާ މިސްކިތްތަކެވެ.
އަމިއްލަ ފަރާތްތަކަށް މި އަހަރު ހުއްދަ ދިން 9 މިސްކިތަކީ:
* އައްޑޫ ހުޅުދޫގައި އާ މިސްކިތެއް ބިނާކުރުން
* ހުޅުމާލޭ ދެވަނަ ފިޔަވަހީގައި 2 މިސްކިތެއް ބިނާކުރުން
* ޒިކުރާ މިސްކިތް ހުރި ބިމުގައި އާ މިސްކިތެއް ބިނާކުރުން
* ބަރުބަރީ މިސްކިތް ހުރި ބިމުގައި އާ މިސްކިތެއް ބިނާކުރުން
* ރ. އަލިފުށީގައި މިސްކިތެއް ބިނާކުރުން
* ހއ. އިހަވަންދޫގައި މިސްކިތެއް ބިނާކުރުން
* ހުޅުމާލެ ދެވަނަ ފިޔަވަހީގެ ލޮޓު 2215ގައި މިސްކިތެއް ބިނާކުރުން
* ހދ. ނޮޅިވަރަންފަރުގައި އާ މިސްކިތެއް ބިނާކުރުން
ރާއްޖޭގެ އެކި ހިސާބުތަކުގައި އަމިއްލަ ފަރާތްތަކުން ބިނާކޮށްފައިވާ މިސްކިތްތައް ވަރަށް ގިނަ އެވެ. އަދި މިފަދަ އިތުރު މަޝްރޫއުތަކެއްގެ މަސައްކަތްތައް މިހާރު ވެސް ކުރިއަށް އެބަދަ އެވެ.
އިސްލާމިކް މިނިސްޓްރީން ބުނީ ގޮތުގައި ސަރުކާރުން ބިނާކުރާ 22 މިސްކިތެއްގެ ޢަމަލީ މަސައްކަތް މިހާރު ވެސް އެކި ހިސާބުތަކުގައި ކުރިއަށް އެބަދެ އެވެ. އަދި އޭގެ ތެރެއިން ތިން މިސްކިތެއް އަންނަ ނޮވެމްބަރު މަހުގެ 17 ގެ ކުރިން ނިންމަން އަމާޒު ހިފާފައިވެ އެވެ.
އެ ތިން މިސްކިތަކީ އދ. ދިގުރަށުގައި އިމާރާތް ކުރަމުން އަންނަ މިސްކިތާއި ނ. މަނަދޫގައި އިމާރާތް ކުރަމުން އަންނަ މިސްކިތުގެ އިތުރުން ހދ. ހިރިމަރަދޫގައި އިމާރާތް ކުރަމުން އަންނަ މިސްކިތެވެ.
މި އަހަރުގެ ތެރޭގައި އަމިއްލަ ފަރާތަކުން ބިނާކުރި ދެ މިސްކިތަކާއި ސަރުކާރުން ބިނާކުރި މިސްކިތެއް ހުޅުވާފައިވެ އެވެ.