ދުނިޔޭގެ ހުރިހާ ކަންކޮޅުތަކުގައި ވެސް، އެއަރލައިންތަކުން ޗުއްޓީތަކާއި ދިމާކޮށް ޓިކެޓްތަކުގެ އަގުތައް ތިރިކުރެއެވެ. އެއީ ވީހާ ވެސް ގިނަބަޔަކަށް ފުރުޞަތު ދިނުމުގެ ގޮތުންނާއި، ތަފާތު އެކިކަހަލަ ޕްރޮމޯޝަންތައް ހިންގުމުގެ ބޭނުމުގައެވެ.
ނަމަވެސް، އަޅުގަނޑުމެންގެ ގައުމީ އެއަރލައިން، "މޯލްޑިވިއަން" ގެ ވިސްނުން އަބަދުވެސް ބަހައްޓަނީ މިއާއި ޚިލާފަށެވެ. ކޮންމެ ޗުއްޓީއަކާއި ދިމާކޮށް، ގިނަމީހުން ދަތުރު ކުރާނެކަން އެނގޭތީވެ، ކުރިއާއިލައި ޓިކެޓްތަކުގެ އަގުތައް މައްޗަށް ޖައްސާލައެވެ.
ދެދަރިންނާއި އެކު ޢާއިލާ ގޮވައިންގެ އަހަރަކު އެއްފަހަރު ނޫނީ ދެފަހަރު އަމިއްލަ ވަތަނުގައި ތިބޭ ގާތްތިމާގެ މީހުންނާއި ރައްޓެހިން ދެކިލަން ދިއުމަކީ، ކިތަންމެހާ ވެސް އެދޭ، އެހަނަސް ބޮޑު ޚަރަދެއް ހިނގާ ކަމެކެވެ.
ޗުއްޓީ ފެށެން އަދި ހައެއްކަ ދުވަސް އެބައޮތެވެ. އެހެންކަމުން ކުރީބައިގައި ޓިކެޓެއް ނަގަން އުޅެފިނަމަ އަގުހެޔޮ ޓިކެޓެއް ލިބޭނެކަމުގެ އުއްމީދުގައި، މޯލްޑިވިއަންގެ ވެބްސައިޓް ހާވާލީމެވެ. ކަމަކުދާކަށް ނެތެވެ. މިއިން ޒަމާނަކު ވެސް ޓިކެޓްތަކުގެ އަގު ބޮޑު ނުވާވަރަށް ބޮޑެވެ. އަމުދަކުން އަގު ހެޔޮ ޓިކެޓެއް ލޮލަކަށް ނުފެނުނެވެ. ޓިކެޓްތަކުގެ އަގުތައް ހުރީ، ޗުއްޓީއާއި ދިމާވާ ދުވަސްތަކުގައި، އަދި ވަކީން ބޮޑުކޮށެވެ.
ސްކޫލްތަކުގެ ޓާމް ޗުއްޓީ ފެށެނީ، 5 ޖޫން ގައެވެ. އަދި ނިމެނީ 12 ޖޫން ގައެވެ. މިދުވަސްތަކުގެ ދަތުރު ކުރާނަމަ، ޓިކެޓްތަކުގެ އަގުތައް ހުރީ ދެކޮޅު ޓިކެޓަކަށް 3050 ރުފިޔާ (ނުވަތަ 197.75 ޑޮލަރު) ގެ ރޭޓުންނެވެ. އަދި ބޭރު މީހެއްނަމަ، މިޢަދަދު 7227 ރުފިޔާ (ނުވަތަ 468.67 ޑޮލަރު) އެވެ.
އެހެން އެއާރލައިންތަކާއި އަޅާ ބަލާއިރު އެއީ، މެލޭޝިއާ އެއަރ ލައިނުން ޗުއްޓީއާއި ދިމާކޮށް މާލެ-ބެންކޮކް-މާލެ ދެކޮޅު ޓިކެޓާއި އެއްވަރު ޢަދަދެކެވެ. ނުވަތަ، ސްރީލަންކަން އެއަރލައިނުން މާލެ-ބެންކޮކް-މާލެ ދެކޮޅު ޓިކެޓެވެ. ނޫނީ، އެމިރޭޓްސް އިންނަމަ މާލެ-ކޮލަމްބޯ-މާލެ އަށް އަންހެނުންނާއި ދެދަރިންނާއި އެކު ދަތުރު ކުރެވިދާނެ ޢަދަދެކެވެ.
ބޭރުގައުމުތަކުގެ އެއަރލައިތަކުން ކުރާ އިންޓަނޭޝަނަލް ދަތުރަކަށް އެއަރ ލައިންތަކުން އެހެން އެއަރޕޯޓްތަކަށް ދައްކަން ޖެހޭ ކުލި ވެސް ބޮޑު ވާނެ އެވެ. އަދި ކުރަން ޖެހޭނެ އިތުރު ޚަރަދުތައް ވެސް އެހާމެ ގިނަ ވާނެއެވެ. އެއާއި ޚިލާފަށް މިދައްކަނީ، ގައުމީ އެއަރލައިނުން ކުރާ ޑޮމެސްޓިކް ދަތުރުތަކުގެ ވާހަކައެވެ.
ކުރަން ޖެހޭ އިތުރު ޚަރަދުތަކެއް ނެތް އިރުވެސް، އިރުމަތީ އޭޝިއާއަށް ކުރާ ދަތުރަކާއި އެއްވަރުގެ އަދަދެއް މޯލްޑިވިއަނުން ދިވެހީންގެ އަތުން ނަގައެވެ. މިވަރުން ގާތްތިމާގެ މީހުންނާއި ރައްޓެހިން ދެކިލުމަށްޓަކައި، އަމިއްލަ ވަތަނަށް ޗުއްޓީއަށް ޖައްސާލެވެނީ ކިހިނަކުން ހެއްޔެވެ.
މިއީ، ރޯމާދުވާލު ރައްޔިތުންގެ ޖީބުން ފޭރިގަތުން ނޫން ދެން ކޮން ކަމެއް ބާއެވެ.
ވިލާ އެއަރ އިން މިދިޔަ ހަފްތާއާއި ޖެހެންދެން ގަމަށް ކުރަމުން ދިޔަ ދަތުރުތައް ވެސް ވަނީ، ސަރުކާރުގެ ފިއްތުން ތަކާއި ހެދި މާލީ ޙާލަތު ދަށަށް ދިއުމުގެ ސަބަބުން މެދު ކަނޑާލާފައެވެ. ވިލާގެ ފްލައިޓްތައް އައުމުގެ ކުރިން މޯޑިވިއަން އިން ވަނީ، އެކަށީގެން ނުވާފަދަ ބޮޑު އަގުތަކުގައި ޓިކެޓް ވިއްކާފައެވެ.
އެހެންކަމުން ކުރިއަށް އޮތް ދުވަސްތަކުގައި، އަނެއްކާވެސް އަގުތައް މަތި ކުރާނެކަމުގެ އިޙްސާސް މިހާރު އަނެއްކާވެސް ކުރެވެއެވެ.