އޮލިމްޕަހުގައި ހައުސްފުލް ޝޯތަކެއް ދެއްކުމަށް ފަހު މިހާރު ހުޅުމާލޭގެ ޝްވެކް ސިނަމާގައި މިހާރު ދައްކަމުން އަންނަ "ކަމަނާ" ގެ އިތުރު ޝޯތަކެއް އައްޑޫގައި ބާއްވާ ގޮތަށް ނިންމައިފި އެވެ.
މި މަހުގެ 19 އާއި 20 ގައި ގަމުގެ ބްލޫ ލެގޫންގައި އެ ފިލްމުގެ ހައުސްފުލް ޝޯތަކެއް ދައްކާފައިވާ އިރު، 21 ވަނަ ދުވަހުގެ ރޭ ހުޅުމީދޫގައި ވެސް ފިލްމު ޝޯއެއް ދައްކާފައިވެ އެވެ.
އައްޑޫގެ ގުޅިފައިވާ އަވަށްތަކުން "ކަމަނާ" އަށް ލިބުނު ބޮޑު ތަރުހީބާ ގުޅިގެން ވަދާއި ޝޯތަކެއްގެ ގޮތުގައި އިތުރު ދެ ޝޯއެއް ދައްކަން ނިންމައި، އެ ޝޯތަކުގެ ޓިކެޓަށް ވެސް މިހާރު އޮތީ ހުޅުވާލައިފަ އެވެ. އެ ދެ ޝޯ ދައްކާނީ އަންނަ މަހުގެ 3 އާއި 4 ގައި މަރަދޫގެ ބޮޑޮގޭގަ އެވެ.
މިދިޔަ މަހުގެ 27 ގައި "ކަމަނާ" އޮލިމްޕަހުގައި ޕްރީމިއާކުރި ފަހުން މިހާތަނަށް ރާއްޖޭގެ ވަރަށް ގިނަ ރަށްރަށުގައި ފިލްމު ދައްކާފައިވެ އެވެ. އަދި މިހާރު ވެސް އެކި ރަށްރަށުގައި ފިލްމު ދައްކަމުން އަންނަ އިރު، އިތުރު ރަށްތަކެއްގައި އަޅުވަން ތާވަލު ވެސް ކޮށްފައިވެ އެވެ.
"ކަމަނާ" އަކީ މަހުދީ އަހުމަދުގެ ސްކްރީންޕްލޭއަކަށް ޝާނީޒް އަލީ ޕްރޮޑިއުސްކޮށް ހުސައިން މުނައްވަރު ޑައިރެކްޓްކުރި ފިލްމެކެވެ. ގެވެށިއަނިޔާ އަށް ބިނާކޮށް ހަދާފައިވާ މި ފިލްމުގެ ލީޑް ތަރިންނަކީ މަރިޔަމް އައްޒަ އާއި ޔޫސުފް ޝަފީއު (ޔޫއްޕެ) ގެ އިތުރުން އައިނިމަތު ރަޝްފާ (އާޝާ) އެވެ.
އޮލިމްޕަހުގައި މިހާރު ދައްކަމުން އަންނަ މި މަހުގެ 19 ގައި ޕްރީމިއާކުރި ޑައިރެކްޓަރު އަމްޖަދު އިބްރާހީމް (އަމްޖޭ) ގެ ލޯބީގެ ބިރުވެރި ފިލްމު "އުދަބާނި 2" އެވެ.