އޭޝިއާ ޕެސިފިކް ރީޖަނަލް ފޯރަމް އޮން ހެލްތް އެންޑް އެންވަޔަރަންމަންޓް (އޭޕީއާރްއެފްއެޗްއީ) ގެ 12 ވަނަ މަތީ ފެންވަރުގެ ބައްދަލުވުން މިއަދު ފަށައިފި އެވެ.
އިންޑޮނޭޝިއާގެ ވެރިރަށް ޖަކާޓާގައި ކުރިއަށްދާ މި ބައްދަވުމުގައިރާއްޖޭގެ ފަރާތުން ބައިވެރި ވަނީ ހެލްތު މިނިސްޓްރީ އާއި އެންވަޔަރަމަންޓް މިނިސްޓްރީގެ ވަފުދެކެވެ.
މި ބައްދަލުވުމުގައި އޭޝިއާ ޕެސިފިކް ސަރަޙައްދުގައި ދިމާވެފައިވާ ޞިއްޙީ އަދި ތިމާވެށީގެ ކުއްލި ހާލަތްތަކާ ކުރިމަތިލުމަށް އެކަށައަޅަން ޖެހޭ ސްޓްރެޓެޖީތަކާ ބެހޭގޮތުން މަޝްވަރާ ކުރާނެ އެވެ. އަދި އަންނަ ބުރާސްފަތީީގައި ބާއްވަން ހަމަޖެހިފައިވާ 5 ވަނަ މިނިސްޓީރިއަލް ބައްދަލުވުމަށް ތައްޔާރުވުމުގެ މަސައްކަތްތައް ވެސް މި ބައްދަލުވުމުގައި ކުރިއަށް ދާނެ އެވެ.
އޭޕީއާރްއެފްއެޗްއީ އަކީ އޭޝިއާ ޕެސިފިކް ސަރަޙައްދުގެ ޤައުމުތަކުގެ މެދުގައި ޞިއްޙަތާއި ތިމާވެށީގެ ދާއިރާއިން އެއްބާރުލުން އިތުރުކޮށް، މި ދާއިރާތަކުގައި ދިމާވާ ގޮންޖެހުންތަކަށް ޙައްލު ހޯދުމަށް މަސައްކަތްކުރާ މުހިންމު ފޯރަމެކެވެ.
މި ބައްދަލުވުމުގައި ބައިވެރިވާ ދިވެހި ވަފުދުން މި ސަރަޙައްދުގެ އެހެން ޤައުމުތަކާ އެކު ގުޅިގެން މަސައްކަތް ކުރުމަށް ބާރު އަޅާނެ އެވެ.