ޑާކް ރެއިން އެންޓަޓައިންމަންޓުން އަންނަ މަހު ގެނެސްދޭން އުޅޭ ފިލްމު "ބިބީ" ގެ ޕްރޮމޯޝަނަލް ލަވަ ބުރާސްފަތީގައި ދައްކައިލަން ނިންމައިފި އެވެ.
މި ލަވައިގެ ނަމަކީ "ލާލު" އެވެ.
އަންނަ މަހުގެ 7 ގައި ޕްރީމިއާކުރަން ހަމަޖެހިފައިވާ މި "ބިބީ" އަކީ އާ ޑައިރެކްޓަރު ޝަހުދާ މަހުމޫދު ލިޔެ، ޑައިރެކްޓްކޮށްފައިވާ ހޮރޯ-ކޮމެޑީއެކެވެ. މީގެ ލީޑް ތަރިންނަކީ ޝަރަފު އަބްދުﷲ އާއި މަރިިޔަމް މަޖުދާ (މަޖޫ) އެވެ.
ފިލްމުގެ އިތުރު ކާސްޓުންގެ ތެރޭގައި ޝީލާ ނަޖީބު، އަހުމަދު ސައީދު، އަބްދުﷲ ޝާފިއު (ފުބޫ)، އަހުމަދު ޝާކިރު (ޝާއްކޮ އައްމަޑޭ)، މަލީހާ ވަހީދު، ޝުހާ، އާދަމް ރިޒްވީ، ސާމީ، އަމަން ހާޒިފު އަދި މަރިޔަމް ހަލީމް ހިމެނެ އެވެ.
"ބިބީ" އަކީ ޑާކް ރެއިނުން މި އަހަރު ގެނެސްދޭ ދެވަނަ ފިލްމެވެ. އެ ސްޓޫޑިއޯގެ މި އަހަރުގެ ފުރަތަމަ ފިލްމަކީ މާޗްގައި ގެނެސްދިން "ފުރޭތަ އެވެ.