ޤާނޫނާ ހިލާފަށް ވަޒީފާތަކުން ވަކި ކުރާ ފަރާތްތަކަށް ޤާނޫނީ އެހީތެެރިކަން ދޭން އިދިކޮޅު އެމްޑީޕީން ނިންމައިފި އެވެ.
އެމްޑީޕީން ބުނީ ސަރުކާރުގެ ކުންފުނިތަކާއި، ސިވިލް ސަރވިސްގައި ވަޒީފާ އަދާކުރާ މުވައްޒަފުންގެ ތެރެއިން ސަރުކާރަށް ނުވަތަ ރައީސް ޑރ. މުހައްމަދު މުއިއްޒަށް ތާއީދުނުކުރާ މުވައްޒަފުންނަށް ސިޔާސީ ގޮތުން ބިރުދައްކައި، ސިޔާސީ ސަބަބުތަކަށްޓަކައި ވަޒީފާތަކުން ވަކިކުރަމުންދާ ކަމަށެވެ.
އެގޮތުން އެކަމުގައި އަޅަންޖެހޭ ގާނޫނީ ފިޔަވަޅުތައް އެޅުމުގައި އެ މުވައްޒަފުންނަށް އެހީތެރިވުމަށް އެމްޑީޕީން ނިންމާފައިވާ ކަމަށް އެ ޕާޓީން ބުނެ އެވެ.
އެމްޑީޕީން ވަނީ ސިޔާސީ ގޮތުން ވަޒީފާއިން ވަކިކުރެވޭ ނުވަތަ ސިޔާސީ ސަބަބުތަކަށްޓަކައި ފިޔަވަޅު އެޅޭ މުވައްްޒަފުންގެ ތެރެއިން އެ ޕާޓީގެ ގާނޫނީ އެހީތެރިކަން ބޭނުންވާ ފަރާތްތަކުން މެއިލް މެދިވެރިކޮށް ނުވަތަ ވައިބާއިން މައުލޫމާތު ހިއްސާ ކުރުމަށް އެ ޕާޓީން ވަނީ އެދިފަ އެވެ.
އެމްޑީޕީން ބުނީ މެއިލް ކުރާނީ helpline@mdp.org.mv އަށް ކަމަށެވެ. އަދި ވައިބާ ކުރާނީ 7341637 އަށް ކަމަށެވެ.