ފުވައްމުލަކު ސިޓީ ކައުންސިލުން މިއަދު އެޕްރެންޓިސް ޕްރޮގްރާމެއް ފަށައިފި އެވެ.
މިއީ ވަޒީފާގެ މައިދާނަށް ޒުވާނުން އަހުލުވެ ރިކުރުމަށް ފުވައްމުލައް އެ ކައުންސިލުން މުޅިން އަލަށް ފެށި ޕްރޮގްރާމެކެވެ. އަދި މިއީ ރާއްޖޭގެ ކައުންސިލެއްގައި އެޕްރެންޓިސް ޕްރޮގްރާމެއް ހިންގާ ފުރަތަމަ ފަހަރެވެ.
ފުވައްމުލަކު ކައުންސިލުން ބުނީ 14 ބައިވެރިންނާ އެކީ ފެށި އެޕްރެންޓިސް ޕްރޮގްރާމަކީ މަސައްކަތުގެ ދުނިޔެއަށް ނުކުންނަ ޒުވާނުންނަށް މަސައްކަތުގެ ހުނަރު ދަސްކޮށްދީ، މަސައްކަތުގެ ތަޖުރިބާ ހޯދުމަށް ތަނަވަސް ފުރުސަތުތަކެއް ހުޅުވާލަދީ ޒުވާނުން ބާރުވެރި ކުރުވުމަށް ކުރިއަށް ގެންދާ ޕްރޮގްރާމެއް ކަމަށެވެ.
އަދި މިއަދު މި އެޅި ފުރަތަމަ ފިޔަވަޅަކީ ކުރިމަގުގައި މަސައްކަތުގެ ސަގާފަތާއި މަސައްކަތުގެ އަހުލާގު ގެންގުޅޭނެ ގޮތުގެ ބިންގާ އެޅިގެންދާނެ, އަމިއްލައަށް ޒިންމާ ނެގުމާއި، ލިބިފައިވާ އިލްމު އޭގެ ފުރިހަމަ ގޮތުގައި ބޭނުންކުރުމާއި، އެކުގައި މަސައްކަތްކުރާ އެހެން މީހުންނާއިއެކު އޮންނަން ޖެހޭ ގުޅުމާއި މަސައްކަތުގެ މާހައުލުގައި ގެންގުޅެން ޖެހޭ އާންމު އުސޫލުތައް ބައިވެރިންނަށް ދަސްވެގެންދާނެ ޕްރިގްރާނެއް ކަމަށް ބުންޏެވެ.
ޕްރޮގްރާމްގެ ތެރެއިން ބައުވެރިން މަސައްކަތުގެ މާހައުލަށް ބައިވެރިން އަހުލުވެރިކުރުމަށް ތަފާތު ބައިތައް ކުރިއަށް ގެންދާނެ އެވެ. އޭގެ ތެރޭގައި ކައުންސިލް އިދާރާގޭ ހުރިހާ ދާއިރާއަކުން ވެސް އިލްމީ ތަޖުރިބާ އާއި ތަމްރީނު ދިނުމާއި ވަޒީފާގެ އަމަލީ ތަޖުރިބާ ހޯދުމަށާއި މަސައްކަތް ރޭވުމަށާއި ވަގުތު މެނޭޖު ކުރުންފަދަ ކަންކަމަށް ބައިވެރިން އަހުލުވެރިކުރުމަށް ތަޖުރިބާ ލިބިފައިވާ މުވައްޒަފުންނާ އެކު މަސައްކަތްކުރުން ހިމެނެ އެވެ.