ސްރީލަންކާގެ ރައީސް އަނޫރާ ޑިސަނަޔަކަ، އެގައުމުގެ ގާނޫނު ހަދާ މަޖިލިސް އުވާލައިފި އެވެ.
ލަންކާގެ ރައީސަށް ލިބޭ ބާރުގެ ދަށުން ރައީސް އަނޫރާ އެގައުމުގެ ގާނޫނުހަދާ މަޖިލިސް އުވާލުމަށްފަހު އަންނަ ނޮވެމްބަރު މަހުގެ 14 ވަނަ ދުވަހު ލަންކާގައި އާންމު އިންތިހާބު ބޭއްވުމަށް މިހާރު ވަނީ ނިންމަވާފަ އެވެ.
ވެރިކަމަށް ވަޑައިގެންނެވުމުގެ ކުރިން ވެސް އަނޫރާ ވަނީ އިންތިހާބު ކާމިޔާބު ކުރެވިއްޖެނަމަ ގާނޫނު ހަދާ މަޖިލިސް އުވާލައްވާނެ ކަމަށް ވިދާޅުވެފަ އެވެ. ލަންކާގެ މިހާރުގެ ގާނޫނު ހަދާ މަޖިލީހުގެ ދައުރު ހަމަވާނީ އަންނަ އަހަރުގެ އޮގަސްޓަށެވެ.
ލަންކާގެ ގާނޫނު ހަދާ މަޖިލީހުގައި ރައީސް އަނޫރާ ނިސްބަތްވެވަޑައިގަންނަވާ ޕާޓީގެ ތިބީ އެންމެ ތިން މެމްބަރުންނެވެ.
މިދިޔަ ހޮނިހިރު ދުވަހު ލަންކާގައި ބޭއްވި ރިޔާސީ އިންތިހާބު ކާމިޔާބު ކުރެއްވި އަނޫރާ ގެންދަވަނީ ސަރުކާރު އެކުލަވާލުމުގެ މަސައްކަތް ކުރައްވަމުންނެވެ. އެގޮތުން އެގައުމުގެ ބޮޑުވަޒީރު ކަމަށް އަނޫރާ މިއަދު ވަނީ ޑރ. ހަރިނީ އަމަރަސޫރިޔާ އައްޔަންކުރައްވާފަ އެވެ.
ޑރ. ހަރިނީ ،54، އަކީ ލަންކާގެ ތިންވަނަ އަންހެން ބޮޑުވަޒީރެވެ. މީގެ ކުރިން މި މަގާމު ފުރުއްވާފައިވަނީ ސިރިމާވޯ ބަންޑާރަނާއިކަ އާއި ޗަންދްރިކާ ބަންޑާރަނާއިކަ ކުމާރަތުންގާ އެވެ.