އަމާޒަކީ 2040 އަންނަންވާއިރަށް ރާއްޖެ ތަރައްގީވެފައިވާ ގައުމަކަށް ހެދުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އދގެ އާންމު މަޖިލީހުގެ 79 ވަނަ ބައްދަލުވުމުގައި މިރޭ ދެއްވި ތަގުރީރުގައި ރައީސް ވިދާޅުވީ 2040 ވަނަ އަހަރަކީ ރާއްޖޭގެ މިނިވަންކަމަށް 75 އަހަރު ފުރޭ ތާރީހީ އަހަރު ކަމަށާއި 2040 އަންނައިރު ރާއްޖެއަކީ ތަރައްގީވެފައިވާ ގައުމަކަށް ހަދަން ބޭނުންވާ ކަމަށެވެ.
އެ ތަސައްވުރާމެދު ބަޔަކު ޝައްކު އުފައްދަފާނެ ކަމަށާއި ނަމަވެސް ހަރުދަނާ ޕްލޭނެއް އޮތްނަމަ އެއީ ހާސިލުނުކުރެވޭނެ ކަމެއް ނޫން ކަމަށް ރައީސް ވިދާޅުވި އެވެ. އަދި އެކަން ހާސިލުކުރަން މުހިންމު ފިޔަވަޅުތަކެއް އަޅަމުން އަންނަކަން ވެސް ރައީސް ފާހަގަކުރެއްވި އެވެ.
އެގޮތުން ރާއްޖޭގެ އިގުތިސާދު ސިންދަފާތުކުރުމާއި ކަނޑުގެ ވަސީލަތްތައް އެންމެ ރަނގަޅަށް ބޭނުންކުރުމުގެ މުހިއްމުކަން ފާހަގަކުރައްވަމުން ރައީސް ވަނީ އެންމެން ބައިވެރިވާ ތަރައްގީއެއް ހޯދަން ޑިޖިޓަލް އިކޮނޮމީއަކީ ލާޒިމު ކަމެއް ކަމަށްވެސް ވިދާޅުވެފަ އެވެ. އަދި ތަރައްގީ ވެފައިވާ ގައުމަކަށް ވުމަކީ ވަރަށް ބުރަ މަސައްކަތެއް ކަމުގައި ހީވި ނަމަވެސް ބޮޑެތި ގޮންޖެހުންތަކަކާއި ކުރިމަތިލައިގެންވެސް ކުރިއަރައިގެން ދިއުމަކީ، ދިވެހިންނަށް އާ ކަމެއް ނޫންކަން ރައީސް ފާހަގަކުރެއްވި އެވެ.
މީގެއިތުރުން ރައީސްގެ ތަގުރީރުގައި ވަނީ ދުނިޔެއަށް މިވަގުތު ބޮޑެތި މައްސަލަތަކެއް ކުރިމަތިވެފައިވާކަން ވެސް ފާހަގަކުރައްވާފަ އެވެ. އަދި އެ މައްސަލަތަކުގެ ސަބަބުން އަސަރުނުކުރާ ޤައުމެއް ނެތް ކަމަށާއި ނަމަވެސް އެކަންކަމަށް ހައްލު ގެންނަން އެކަށީގެންވާ މަސައްކަތެއް ނުކުރެވޭ ކަމަށް ވިދާޅުވި އެވެ.
މިއީ، ރައީސް މުއިއްޒު އދ.ގެ އާންމު މަޖިލީހުގައި ތަގުރީރުކުރެއްވި ފުރަތަމަ ފަހަރެވެ.