އިޒްރޭލު ފިޔަވާ ރާއްޖޭގެ ހަތުރެއް ދުނިޔޭގައި ނެތް ކަމަށް ޑިފެންސް މިނިސްޓަރު މުހައްމަދު ގައްސާން މައުމޫން ވިދާޅުވެއްޖެ އެވެ.
އދގެ އާންމު މަޖިލީހުގެ 79 ވަނަ ބައްދަލުވުމުގައި ރައީސް ޑރ. މުހައްމަދު މުއިއްޒު ދެއްވި ތަގުރީރާ ގުޅިގެން ދައުލަތުގެ މީޑިއާގައި ރޭ ވާހަކަދައްކަމުން ގައްސާން ވިދާޅުވީ ރައީސް މުއިއްޒުގެ "މޯލްޑިވްސް ފަސްޓް" ޕޮލިސީގެ ދަށުން އެކުވެރިކަމާ އެކީ ރާއްޖެއާއެކު މަސައްކަތް ކުރަން ތިބި ކޮންމެ ގައުމާއެކު މަސައްކަތް ކުރާނެ ކަމަށެވެ. އަދި އިޒްރޭލު ފިޔަވާ ރާއްޖޭގެ ހަތުރެއް ދުނިޔޭގައި ނެތް ކަމަށް ގައްސާން ވިދާޅުވި އެވެ.
"އެއީ ފަލަސްތީނަށް ދެމުންގެންދާ އަނިޔާވެރި ހަމަލާތަކުގެ ސަބަބުން. އެ ވާހަކަ ވަރަށް ފުރިހަމަކޮށް ރައީސްގެ ތަގުރީރުގައި ގެނެސްދެއްވި،" ގައްސާން ވިދާޅުވި އެވެ.
ރައީސް ދެއްވި ތަގުރީރުގައި އިޒްރާއީލުގެ ޢަމަލުތައް ކުށްވެރިކުރައްވަމުން ވަނީ އެ ޖަރީމާތަކުގެ ސަބަބުން، އަންހެނުންނާއި ކުޑަކުދިންނާއި ތުއްތު ކުދިން ހިމެނޭހެން، ފަލަސްޠީނުގެ އެތައް ހާސް ރައްޔިތުންނެއް މަރުވެ، ޒަޚަމްވަމުންދާކަން ހަނދުމަފުޅުކޮށް އަރުވާފަ އެވެ. އަދި ފަލަސްޠީނުގެ ރައްޔިތުންގެ ގެދޮރާއި، ހަސްފަތާލުތަކާއި، ސްކޫލްތަކާއި އަދި އިންސާނީ އެހީތެރިކަމަށް ބޭނުންކުރާ ވަޞީލަތްތަކަށް އަމާޒުކޮށްގެން އިޒްރޭލުން ދޭ ހަމަލާތަކަށް އެމަނިކުފާނު ވަނީ ފާޑުވިދާޅުވެފަ އެވެ.
މީގެއިތުރުން ފަލަސްތީނުގެ ޣައްޒާގައި ޢާންމުން މަރުވަމުންދާ މިންވަރު ދުނިޔެއަށް ބަލައިނުގަނެވިގެން އުޅެނިކޮށް، މިހާރު އިޒްރާއީލުން ލުބްނާނަށް ޙަމަލާދީ، އެ ޙަމަލާތަކުގައި އެތައް ސަތޭކަ ޢާންމުންނެއް މަރުވަމުންދާކަން ފާހަގަކުރެއްވި އެވެ.
ރައީސް ވަނީ އދ.ގެ ޤަރާރުތަކާއި ބައިނަލްއަޤުވާމީ ޤާނޫނުތަކާ ޚިލާފުވެ، އިޒްރޭލުން ހިންގާ ޓެރަރިޒަމްގެ ޢަމަލުތަކަށް އެގައުމު ޖަވާބުދާރީ ކުރުވުމަށް ވެސް ގޮވާލައްވާފަ އެވެ.