ސްޕެނިޝް ލީގުގައި ރޭ ރެއާލް މެޑްރިޑުން 3-2 އިން އަލަވޭސް ބަލިކޮށްފި އެވެ.
ރޭގެ މެޗަކީ ރެއާލްގެ ކޯޗު ކާލޯ އެންޗެލޯޓީ އެ ކްލަބަށް އިރުޝާދުދިން 300 ވަނަ މެޗެވެ. އެ 300 މެޗުގެ ތެރެއިން 216 މެޗުން ރެއާލް މޮޅުވިއިރު، ރެއާލް ބަލިވެފައިވަނީ 39 މެޗުންނެވެ. ބާކީ 45 މެޗު ނިމުނީ އެއްވަރުވެގެންނެވެ. އެންޗެލޯޓީ އަކީ ރެއާލްއާއެކު 300 މެޗު ހަމަކުރި ދެވަނަ ކޯޗެވެ. މީގެކުރިން އެ ޝަރަފު އޮތީ މިގޭލް މުނޯޒްގެ އަތުގަ އެވެ.
އަމިއްލަ ދަނޑުގައި ކުޅުނު މި މެޗު ފެށިގެން 57 ވަނަ ސިކުންތުގެ ތެރޭގައި ލޫކަސް ވަޒްކޭޒް ވަނީ ރެއާލަށް ލީޑު ނަގައިދީފަ އެވެ. މިއީ ވިނީޝަސް ޖޫނިއާ ތަނަވަސްކޮށްދިން ފުރުސަތަކުން އަލަވޭސްގެ އޭރިއާ ތެރޭ ހުރެ ފޮނުވާލި ހަމަލާއަކުން ކާމިޔާބުކުރި ގޯލެކެވެ.
ފުރަތަމަ ހާފް ނިމެން ފަސް މިނެޓަށް ވެފައިވަނިކޮށް ރެއާލްގެ ދެވަނަ ގޯލު ކާމިޔާބުކޮށްދިނީ ކިލިއަންއ އެމްބާޕޭ އެވެ. ޖޫޑް ބެލިންހަމް ދިން ޕާހަކުން އެމްބާޕޭ މި ގޯލު ކާމިޔާބު ކުރީ އަލަވޭސްގެ އޭރިއާ ތެރެއަށް ވަދެ ކުޅުންތެރިއެއް ކައިރިން ނައްޓާލުމަށްފަހު ބޯޅަ ގޯލަށް ވައްދާލައިގެންނެވެ. މިއީ ރެއާލަށް ކުޅެދިން 9 ވަނަ މެޗުގައި އޭނާ ކާމިޔާބު ކުރި ހަތްވަނަ ގޯލެވެ.
ރެއާލްގެ ތިންވަނަ ގޯލު ދެވަނަ ހާފް ފެށިގެން މާގިނަ އިރުތަކެއް ނުވަނީސް ރޮޑްރިގޯ ކާމިޔާބުކޮށްދިނީ އަލަވޭސްގެ އޭރިއާ ތެރެއަށް ވަދެ ފޮނުވާލި ބާރު ހަމަލާއަކުންނެވެ.
މި މޮޅާއެކު ރެއާލް އޮތީ ހަތް މެޗުން 17 ޕޮއިންޓު ހޯދައިގެން ލީގުގެ ދެވަނައިގަ އެވެ. އެއްވަނައިގައި ރެއާލަށް ވުރެ އެއް މެޗު މަދުން ކުޅެ 18 ޕޮއިންޓާ އެކު އޮތީ ބާސެލޯނާ އެވެ. ލީގުގައި ބާސާ މިރޭ އަމިއްލަ ދަނޑުގައި ނިކުންނާނީ ގެޓާފޭއާ ދެކޮޅަށެވެ.