ހުޅުމާލޭގެ ރައުންޑްއެބައުޓްތަކުގައި ބަހައްޓާ މޮނިއުމަންޓްތައް ޑިޒައިންކުރުމުގެ މުބާރާތަކަށް ހުޅުުވާލައިފި އެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނީ ހުޅުމާލޭގައި ރައުންޑްއެބައުޓްސްތައް އިތުރުވަމުން އަންނަ އިރު ރާއްޖޭގެ ރީތިކަން ރަމްޒުކޮށްދޭ ފަދަ މޮނިއުމަންޓްތައް ބަހައްޓަން ބޭނުންވާ ކަމަށެވެ. އެހެންވެ ރާއްޖޭގެ ރީތިކަން ރަމްޒުކޮށް ދޭން މޮނިއުމަންޓްތައް ޑިޒައިން ކުރުމުގެ ފުރުސަތު އާޓިސްޓުންނާއި އާކިޓެކްޓުންނާއި ޑިޒައިނަރުންނަށް މިހާރު ވަނީ ހުޅުވާލައިފަ އެވެ.
އެންމެ ރީތި މޮނިއުމަންޓްތައް ޑިޒައިންކޮށްދޭ ފަރާތަކަށް 100،000ރ. ރުފިޔާގެ އިނާމެއް ވެސް ލިބޭނެ އެވެ.
ޑިޒައިންތައް ހުށަހަޅުމުގެ ފުރުސަތު ހުޅުވާލައިފައި ވަނީ އަންނަ މަހުގެ 30 އާ ހަމައަށެވެ.
އެޗްޑީސީން ޕްލޭންކޮށްފައި ވަނީ 11 ރައުންޑް އެބައުޓްސްގައި މޮނިއުމަންޓް ބަހައްޓާށެވެ. އެެއީ ހުޅުމާލޭގެ ފޭސް އެކެއްގެ ހަތަރު ރައުންޑްއެބައުޓްސް އާއި ފޭސް ދޭއްގެ 8 ތަނެކެވެ.