މައްސަލައެއްގައި ހިފަހައްޓައި ޕޮލިހަށް ގެންދިއުމުން ފުލުހަކު "ކޮށާލާނެ" ކަމަށް ބުނެ އިންޒާރު ދިން މީހަކު ޖަލަށްލާން ހުކުމްކޮށްފި އެވެ.
ދެހާސް ވިހީގެ އެ ހާދިސާއާ ގުޅިގެން ފަސް މަހާއި 23 ދުވަހަށް ޖަލަށް ލާން ފޭދޫ މެޖިސްޓްރޭޓް ކޯޓުން ހޯމަ ދުވަހު ހުކުމްކުރީ އައްޑޫ ފޭދޫ، ސްނޯވައިޓް، އަހްމަދު ޝިޔާޒްގެ މައްޗަށެވެ.
އެ މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި ފުލުހަކާ ދިމާލަށް މަގުމަތިން ފެނިއްޖެއްޔާ "ކޮށާލާނެ" ކަމަށާއި "މަރާލާނެ" ކަމަށް ބުނެ އިންޒާރު ދިން މި މައްސަލައިގައި ދައުލަތުން ޝިޔާޒްގެ މައްޗަށް ކުރީ މީހެއްގެ ފުރާނައަށް ނުވަތަ ހަށިގަނޑަށް ގެއްލުންދީފާނެކަމުގެ ބިރު ދެއްކުމުގެ ކުށުގެ ދައުވާ އެވެ.
މި މައްސަލައިގެ ޝަރީއަތުގައި އޭނަ ވަނީ ތުހުމަތުތަކަށް އިިންކާރުކޮށްފަ އެވެ. ނަމަވެސް ޝިޔާޒުގެ މައްޗަށް ހުކުމްކުރީ ދައުލަތުން ކޯޓަށް ހުށަހެޅި ހެކިތަކުގެ އަލީގައި ކުށް ސާބިތުވެގެންނެވެ.
ކުށް ސާބިތުވުމުން ޝިޔާޒް ވަނީ ވީހާ ވެސް ލުއި އަދަބެއް ދިނުމަށް ވެސް އެދިފަ އެވެ.