"ރިހެބިލިޓޭޝަން 2030 އިނީޝިއޭޓިވް: ދިވެހިރާއްޖޭގެ ހާލަތު" ގެ ނަމުގައި ގައުމީ ޔުނިވާސިޓީގައި ސެމިނާއެއް ބާއްވަން ތައްޔާރުވެއްޖެ އެވެ.
މާދަމާ މެންދުރު ފަހު 1:00 ގައި އެމްއެންޔޫގެ ބީ ބްލޮކް އޮޑިޓޯރިއަމްގައި ބޭއްވުމަށް ހަމަޖެހިފައިވާ މި ސެމިނާގައި ޑަބްލިއުއެޗްއޯ) އިން "ރިހެބިލިޓޭޝަން 2030 އިނީޝިއޭޓިވް"ގެ ނަމުގައި ފަށާފައިވާ ޕްރޮގްރާމްގެ މައްޗަށް އަލިއަޅުވައިލާނެ އެވެ. މި ސެމިނާގެ މައިގަނޑު މަގުސަދަކީ ދިމާވާ ބައްޔެއްގެ ސަބަބުން ނުވަތަ މަސްތުވާތަކެތީގެ ވަބާގައި ޖެހިގެން ނުވަތަ އެ ނޫން ވެސް އެހެން ހާލަތެއް މެދުވެރިވެގެން ނަމަވެސް އާންމު މުޖުތަމަޢުގައި ދިރިއުޅުމަށް ނުކުޅެދުންތެރިކަން ކުރިމަތުިވެފައިވާ ފަރާތްތަކަށް ބޭނުންވާ ސިއްޙީ އެހީތެރިކަން ފޯރުކޮށް ދިނުމެވެ.
މީގެ އިތުރުން، އެފަދަ ހާލަތްތަކުގައި ދިރިއުޅެމުން އަންނަ ދިވެހިންނާއި، ރާއްޖޭގައި ރިހެބިލިޓޭޓްކުރުމުގެ ސިއްޙީ އެހީތެރިކަން ލިބުގައި ހުރި ގޮންޖެހުންތަކާއި އެ ގޮންޖެހުންތަކުން އަރައިގަތުމަށް ކުރެވިދާނެ މަސައްކަތްތަކާ ގުޅޭ ގޮތުން ސެމިނާގައި މައުލޫމާތު ހިއްސާ ކުރާނެ އެވެ.
ސެމިނާގައި ޕެނަލިސްޓުންގެ ގޮތުގައި ވާހަކަ ދައްކަވާނީ އެމްއެންޔޫގެ ފެކަލްޓީ އޮފް ހެލްތް ސައިންސަސްގެ ހެޑް އޮފް ޑިޕާޓްމަންޓް އޮފް ރިހެބިލިޓޭޝަން ސައިންސަސް، މުޙައްމަދު ނިމާލާއި ހެލްތު މިނިސްޓްރީގެ ޑައިރެކްޓަ ޖެނެރަލް އޮފް ހެލްތު ސާވިސެސް، ޑރ. އަޙްމަދު އަޝަރަފްގެ އިތުރުން މޯލްޑިވިސް އެލައިޑް ހެލްތުގެ ނައިބު ރައީސް އަދި އައިޖީއެމްއެޗްގެ ޕްރިންސިޕަލް ފިޒިޔޯތެރަޕިސްޓް، ޑރ. އައިޝަތު މަހްފޫޒާ އެވެ.