އިންޑޮނޭޝިއާގެ ޖަކާޓާގެ ސިއްހީ ހިދުމަތްދޭ ތަންތަނަށް ރާއްޖޭގެ ހެލްތު މިނިސްޓަރު ޑރ. އަބްދުﷲ ހަލީލު ޒިޔާރަތް ކުރައްވައި އެތަންތަނުގެ މަސައްކަތްތައް ބައްލަވާލައްވައިފި އެވެ.
ޖަކާޓާގެ ސިއްހީ ދިުމަތްދޭ ތަންތަނަށް މިނިސްޓަރު ޒިޔާރަތްކުރެއްވީ އޭޝިއާ ޕެސިފިކް ރީޖަނަލް ފޯރަމް އޮން ހެލްތު އެންޑް އެންވަޔަރަންމަންޓް (އޭޕީއާރްއެފްއެޗްއީ) ގެ 5 ވަނަ މިނިސްޓަރުންގެ ބައްދަލުވުމާއި 12 ވަނަ ހައި ލެވެލް އޮފިޝަލްސް މީޓިން (އެޗްއެލްއޯއެމް) ގެ ދަތުރުގެ ތެރޭގަ އެވެ.
އެގޮތުން މިނިސްޓަރު އެންމެ ފުރަތަމަ ޒިޔާރަތް ކުރެއްވީ ޓެބެޓް ކޮމިއުނިޓީ ހެލްތު ސެންޓަރަށެވެ. ޕްރައިމަރީ ކެއާ ފެސިލިޓީއެއްގެ ގޮތުގައި ހިދުމަތް ދޭ އެ ސެންޓަރުގެ އެކި ޑިޕާޓްމަންޓްތަކަށް މިނިސްޓަރު ވަޑައިގެން، ކޮމިއުނިޓީ ސާވިސް އަށް ބޭނުންވާ އާ ވަސީލަތްތަކާއި ޚިދުމަތްދޭ ގޮތްތަކާ ބެހޭ މައުލޫމާތު އޮޅުންފިލުއްވި އެވެ.
މީގެ އިތުރުން ހަލީލް ވަނީ އިންޑޮނޭޝިއާގެ އެންމެ ބޮޑު ޕަބްލިކް ޓާޝަރީ ހޮސްޕިޓަލް ކަމަށްވާ ސިޕްޓޯ މަންގުންކުސުމޯ ހޮސްޕިޓަލަށް ޒިޔާރަތް ވެސް ކުރައްވައިފަ އެވެ. އެތަނުގައި ޑިޖިޓަލް ހެލްތާއި، ހެލްތު އިންފޮމޭޝަން މެނޭޖްމަންޓާއި، އުމުރުން ދުވަސްވީ މީހުންނަށް ދޭ ފަރުވާއާއި، ޒަމާނީ ޓެކްނޮލޮޖީ ބޭނުންކޮށްގެން ފަރުވާގެ ކަންކަން ކުރިއަށް ގެންދެވޭނެގޮތާއި ގުޅޭގޮތުން ހޮސްޕިޓަލް މެނޭޖްމަންޓާ އެކީ މަޝްވަރާތަކެއް ކުރެއްވި އެވެ.
މި މަހުގެ 24 އިން މާދަމާގެ ނިޔަލަށް އިންޑޮނޭޝިއާ ށް ކުރައްވާ މި ދަތުރުގައި އެ ގައުމުގެ ސިއްހީ ދާއިރާގެ ފަންނީ ބޭފުޅުންނާ ބައްދަލުކުރައްވާ ސިއްޖީ ހިދުމަތް ދޭ އިތުރު ތަންތަނަށް ވެސް މިނިސްޓަރު ޒިޔާރަތްކުރެއްވުމަށް ހަމަޖެހިފައިވެ އެވެ.
ހެލްތު މިނިސްޓްރީން ބުނީ މިނިސްޓަރުގެ މި ދަތުރުގެ ސަބަބުން ރާއްޖެ އާއި އިންޑޮނޭޝިއާއާ ދެމެދު އޮންނަ ގުޅުން އިތުރަށް ވަރުގަދަވެ، ރާއްޖޭގެ ސިއްހީ ނިޒާމުގެ ކަންކަން ހަރުދަނާ ކުރުމަށް އެއްބާރުލުން ލިބިގެންދާނެ ކަމަށެވެ.