ބޮލީވުޑްގެ ބަތަލާ ޕަރިނީތީ ޗޯޕްޅާގެ ކައިވެންޏަށް އެއް އަހަރު ފުރުން ފާހަގަ ކުރަން ރާއްޖެ އަތުުވެއްޖެ އެވެ.
ފިރިމީހާ ރާގަވް ޗައްޑާއާ އެކީ މި ދަތުރުގެ ތެރެއިން ނަގާފައި ބައެއް ފޮޓޯތަކާއި ވީޑިއޯ ޕަރިނީތީގެ އިންސްޓަގްރާމްގައި ވެސް ޕޯސްޓްކޮށްފައިވެ އެވެ. އެ ދެ މީހުން ކައިވެނި ކުރީ މިދިޔަ އަހަރުގެ ސެޕްޓެމްބަރު 25 ގަ އެވެ.
ރާގަވް އަކީ އިންޑިއާގެ ސިޔާސީ ދާއިރާގައި މަސައްކަތް ކުރަމުން އަންނަ މީހެކެވެ. އަދި އޭނަ އަކީ އާމް އަދުމީ ޕާޓީ (އާޕް) އަށް ނިސްބަތްވާ މީހެކެވެ. ރާގަވް އަކީ އިންޑިއާގެ ގާނޫނު ހަދާ މަޖިލީހުގެ މަތިވެ، ރާޖިއާ ސަބާގެ މެންބަރެކެވެ.
ބޮލީވުޑުން މިހާތަނަށް މާ ބޮޑު ކުރިއެރުމެއް ހޯދިފައި ނުވާ ޕަރިނީތީ އަކީ މަޝްހޫރު ބަތަލާ ޕްރިޔަންކާ ޗޯޕްޅާގެ ކަޒިންއެކެވެ. އޭނަގެ އެންމެ ފަހުގެ ފިލްމަކީ މި އަހަރުގެ ކުރީކޮޅު ނެޓްފްލިކްސް އިން ގެނެސްދިން ޑައިރެކްޓަރު އިމްތިއާޒް އަލީގެ "އަމަރު ސިންގް ޗަމްކީލާ" އެވެ.
ޕަރިނީގެ ކައިވެނީގެ އެނިވާސަރީ ރާއްޖޭގައި ފާހަގަކުރަމުން އަންނަ އިރު، އޭނަގެ މީގެ ކުރިން ވެސް އެތައް ފަހަރެއްގެ މަތިން ރާއްޖެ އަށް ޒިޔާރަތްކޮށްފައިވެ އެވެ.