ގްރީސްގެ ވެރިރަށް އެތެންސްގައި ބާއްވާ "ފަސްޓް ގްލޯބަލް ރޮބޮޓިކްސް ޗެލެންޖް" ގައި ބައިވެރިވާ މާލޭގެ ޣިޔާސުއްދީން ސްކޫލުގެ ޓީމް އެ ގައުމަށް ފުރައިފި އެވެ.
މި މުބާރާތުގައި އެ ސްކޫލުގެ ފަސް ދަރިވަރުންނާ އެކީ ތިން އޮފިޝަލަކު ބައިވެރިވެއެވެ. މުބާރާތުގައި ރާއްޖެއިން މި އަހަރު ބައިވެރި ވަނީ ޣިޔާސުއްދީން ސްކޫލުން އެކަންޏެވެ.
މިދިޔަ އަހަރު އެ މުބާރާތް ސިންގަޕޫރްގައި ބޭއްވި އިރު، ރާއްޖެ އިން ވާދަކުރީ އައްޑޫ ހިތަދޫ ހިރާ ސްކޫލެވެ.
އެތެންސްގައި މާދަމާ ފަށާ "ފަސްޓް ގްލޯބަލް ރޮބޮޓިކްސް ޗެލެންޖް" ގައި 190 އަށް ވުރެ ގިނަ ގައުމަކުން ބައިވެރިވެ އެވެ. މި މުބާރާތް ކުރިއަށް ދާނީ މި މަހުހެ 29 އާ ހަމައަށެވެ.
"ފަސްޓް ގްލޯބަލް ރޮބޮޓިކްސް ޗެލެންޖް" އަކީ އެމެރިކާގެ ފަސްޓް ގްލޯބަލް ޖަމިއްޔާގެ ފަރާތުން ހުރިހާ ގައުމެއްގެ ޒުވާނުންގެ މެދުގައި ސައިންސް އެންޑް ޓެކްނޮލޮޖީ ލީޑާޝިޕާއި އިނޮވޭޝަނަށް ހިތްވަރު ދިނުމުގެ ގޮތުން ކުރިއަށް ގެންދާ މުބާރާތެކެވެ.