ގެތައް މޯގޭޖްކޮށް ނެގި ލޯނުތަކެއް ނުދައްކައިގެން މާލޭގެ ދެ ގެއެއް ވިއްކައިލަން ބޭންކް އޮފް މޯލްޑިވްސް (ބީއެމްއެލް) އިން އިއުލާންކޮށްފި އެވެ.
ނިީލަމުގައި ވިއްކައިލަން ނިންމީ ސަން ފްރަންޓް ލައިޓްޝޮޕްގެ ގޯޅިތެރޭގައި ހުންނަ މ. ނާއިންފަރުއާގެ އާއި ބިސްބުރު ކައިރީގައި ހުންނަ މ. ބީޗްކޯނާ އެވެ.
ނާއިންފަރުއާގެ އަކީ 792 އަކަފޫޓުގެ ގެއެކެވެ. ގޭގެ ނީލަން ފެށޭ އަގަކީ 13 މިލިއަން ރުފިޔާއެވެ. ގެ ގަންނަން ނީލަން ހުށަހެޅުމުގެ މުއްދަތު ހަމަވާނީ އަންނަ މަހުގެ 10 އަށެވެ. ބީޗްކޯނާ އަކީ 927.33 އަކަފޫޓުގެ ގެއެކެވެ. އެ ގޭގެ ނީލަން ފެށޭ އެންމެ ދަށް އަގަކީ 23.8 މިލިއަން ރުފިޔާ އެވެ. އެ އަގު ހުށަހެޅުމުގެ މުއްދަތު ހަމަވާނީ އަންނަ މަހުގެ 15 އެވެ.
ބީއެމްއެލްއިން ބުނީ ދެ ވެސް ގެ ވިއްކާލާނީ އެންމެ ބޮޑު އަގެއް ހުށަހަޅާ ފަރާތަކަށް ކަމަށެވެ. އެންމެ ބޮޑު އަގެއް ހުށަހެޅި ކަމަށް ބަލާނީ ހުށަހަޅާ އެންމެ މަތީ އަގަށް ބަދަލެއް ނައިސް، ފަސް ދުވަސް ވުމުންނެވެ.
މުއްދަތު ހަމަވާ ތާރީޚާ ހަމައަށް އަގު ހުށަހަޅާ މީހުންގެ ތެރެއިން، އެ ވަގުތު އެތަނަށް ހާޒިރުވެ ތިބި މީހުންގެ ހާޒިރުގައި ނީލަން ހުޅުވައި، އެންމެ މަތީ އަގު އިއުލާން ކުރެވޭނެ ކަމަށް ވެސް ގައުމީ ބޭންކުން ބުންޏެވެ.