Last Updated: November 26, 11:52
Tuesday, November 26, 2024
މުނިފޫހިފިލުވުން

ބްރެޑް ޕިޓް ކަމަށް ހެދިގެން ސްކޭމަކުން ފޭރިގެންފި!

ހޮލީވުޑްގެ މަޝްހޫރު ފިލްމީ ތަރި، ބްރެޑް ޕިޓް ކަމަށް ހެދިގެން އަންހެނުންތަކަކާ ސޯޝަލް މީޑިއާ ޕްލެޓްފޯމެއް މެދުވެރިކޮށް "މައްލަވަކޮށް" ފޭރުނު މައްސަލައަކާ ގުޅިގެން ސްޕެއިނުން ފަސް މީހަކު ހައްޔަރުކޮށްފި އެެވެ.

މީޑިއާތަކުން ބުނީ ވަޓްސްއެޕް މެދުރިކޮޮށް ދެ އަންހެނެއްގެ އަތުން މަކަރާއި ހީލަތުން ފައިސާތަކެއް ފޭރިގަތް އިރު، އެ ދެ މީހުންގެ އަތުން ފޭރިގަތް ފައިސާގެ އަދަދު 325،000 ޔޫރޯ (362،000 ޑޮލަރު) އަށް އަރާ ކަމަށެވެ. ދެ އަންހެނުންގެ ތެރެއިން އެކެއްގެ އަތުން ފޭރުނީ 175،000 ޔޫރޯ (195،000 ޑޮލަރު) އެވެ. އަނެއް މީހާގެ އަތުން ފޭރުނީ 150،000 ޔޫރޯ (176،000 ޑޮލަރު) އެވެ.

ފުލުހުން ބުނީ އެ މައްސަލަ ރިޕޯޓްކުރުމާ ގުޅިގެން ފަށާފައިވާ ތަހުގީގުގެ ތެރެއިން ފަސް މީހަކު ހައްޔަރުކޮށް، ފޭރުނު ފައިސާގެ ތެރެއިން 85،000 ޔޫރޯ (95،000 ޑޮލަރު) މިހާތަނަށް ހޯދާފައިވާ ކަމަށެވެ.

މި މައްސަލާފައި އިތުރު ބަޔަކު ވެސް ޝާމިލުވާ ކަމަށާއި އެގޮތުން އިތުރު 10 މީހެއްގެ މައްސަލަ ވެސް ތަހުގީގު ކުރަމުން އަންނަ ކަމަށް ބުންޏެވެ.

ފުލުހުން ބުނި ގޮތުގައި ބްރެޑް ޕިޓް ކަމަށް ހެދިގެން އަންހެނުންތަކެއް އަތުން ފޭރުނީ އެ މީހުންނާ ރައްޓެހިވެ، ކައިވެނިކުރާކަމުގެ ދަަޅަ ވެސް ދައްކައިގެންނެވެ. އަދި ދެ އަންހެނުންގެ އަތުން ފައިސާ ފޭރުނީ މުސްތަގުބަލަށް އިންވެސްޓްމަންޓްތައް ކުރަން ކަމަށް ބުނެ ހައްދާލައިގެންނެވެ.

އެ މީހުންގެ އަތުން ފައިސާތަކެއް ފޭރިގަތީ ހަދާފައިވާ ފޭކް އެކައުންޓްތަކަކަށް ފައިސާ ޖަމާކުރުވައިގެންނެވެ. އަދި އަދި އެ ފައިސާ މިކަމުގައި ޝާމިލުވާ މީހުންގެ އެކައުންޓްތަކަށް ޖަމާކޮށް ލޯންޑަކުރަން "މޫލްސް" ސްފޮޓްވެއާ ވެސް ބޭނުންކޮށްފައިވެ އެވެ.

ނަމަވެސް މުއާމަލާތްތަކެއް ކުރެވުނީ ޕިޓާ ނޫންކަމާއި މިއީ ބޮޑު ސްކޭމެއްކަން ފާހަގަވެގެން މައްސަލަ ފުލުހުންނަށް ރިޕޯޓްކުރީ ލަނޑު ލިބުނު ދެ އަންހެނުންނެވެ.

އެ މީހުން ވަނީ ވަޓްސްއެޕްގެ އިތުުރުން ޓެކްސްޓް މެސެޖާއި އީމެއިލުން ވެސް ފޭރުނު މީހުންނާ މުއާމަލާތްތަކެއްކޮށް ކަމަށް ފުލުހުން ބުންޏެވެ.

ހޮލީވުޑްގެ އެންމެ ނުފޫޒު ގަދަ ތަރިންގެ ތެރޭގައި ހިމެނޭ ޕިޓް، 60، އަކީ މަޝްހޫރު ބަތަލާއިން ކަމަށްވާ ޖެނިފާ އެނިސްޓަނާއި އެންޖެލީނާ ޖޯލީގެ ކުރީގެ ފިރިމީހާ އެވެ. އަންނަ ހުކުރު ދުވަހު ރިލީޒްކުރާ އެކްޝަން ކޮމެޑީ "ވުލްފްސް" ގެ ބަތަލު މިހާރު ރައްޓެހިވެގެން އުޅެނީ އިނިސް ޑި ރެމޯން ކިޔާ މީހަކާ އެވެ.