ސްޕެނިޝް ލީގުގައި ބާސެލޯނާ އިން އަމިއްލަ ދަނޑުގައި ގެޓާފޭއާ ދެކޮޅަށް ކުޅުނު މެޗު 1-0 އިން ކާމިޔާބުކޮށް، ލީގުގައި ކުޅުނު ހަތް ވަނަ މެޗު ވެސް ކާމިޔާބުކޮށްފި އެވެ.
މި މޮޅާއެކު ލީގުގެ އެއްވަނައިގައި ބާސާ މިހާރު އޮތީ 21 ޕޮއިންޓާ އެކު އެވެ. ދެވަނައިގައި 17 ޕޮއިންޓާ އެކު ރެއާލް މެޑްރިޑް އޮތްއިރު، ތިންވަނައިގައި 13 ޕޮއިންޓާ އެކު އޮތީ އެތްލެޓިކް ބިލްބާއޯ އެވެ.
މި ސީޒަނުގައި މޮޅު ކުޅުމެއް ދައްކަމުން އަންނަ ބާސާ އިން މި މެޗުގައި ކާމިޔާބުކުރި ހަމައެކަނި ގޯލު މެޗުގެ 19 ވަނަ މިނެޓްގައި ކާމިޔާބުކޮށްދިނީ ރޮބަޓް ލެވެންޑޯސްކީ އެވެ. މިއީ ގެޓާފޭގެ ގޯލްކީޕަރަށް ހެދުނު ގޯހެއްގެ ފައިދާ ނަގައި އޭރިއާ ތެރޭ ހުރެ ފޮނުވާލި ހަމަލާއަކުން ލެވެންޑޯސްކީ ކާމިޔާބު ކުރި ގޯލެކެވެ.
މި ގޯލަށްފަހު ވެސް ބާސާ އިން ވަނީ ގެޓާފޭގެ ގޯލަށް ނުރައްކާތެރި ގިނަ ހަމާލަތަކެއް ފޮނުވާލާފަ އެވެ. އެގޮތުން ލެވެންޑޯސްކީ އާއި ލަމީން ޔަމާލް އަދި ރަފީނިއާ ފޮނުވާލި ހަމަލާތަކުގެ ހުރަހަކަށްވީ މި މެޗުގައި މޮޅު ކުޅުމެއް ދެއްކި ގެޓާފޭގެ ކީޕަރު ޑޭވިޑް ސޮރިއާ އެވެ.
މި މެޗުގެ ފަހު ވަގުތުކޮޅުތެރޭ ނަތީޖާ އެއްވަރުކޮށްލަން ގެޓާފޭގެ ބޯޖާ މަޔޯރާލް އަށް ވެސް ރަނގަޅު ފުރުސަތެއް ލިބި ބޭކާރުވެފައިވެ އެވެ.
ސްޕެނިޝް ލީގުގައި ބާސާ ދެން ބައްދަލުކުރާނީ އޮސަސޫނާއާ އެވެ.