އިންޓަނޭޝަނަލް މަނިޓަރީ ފަންޑް އައިއެމްއެފް) އިން ޕާކިސްތާނަށް 7 ބިލިއަން ޑޮލަރުގެ ލޯނެއް ދޭން ނިންމައިފި އެވެ.
މި ލޯނުގެ ތެރެއިން އެންމެ ފުރަތަމަ ދޫކުރާ އެއް ބިލިއަން ޑޮލަރު ވަރަށް އަވަހަށް ހަމަޖެހިގެން ދާނެ ކަމަށާއި ލޯނުގެ ބާކީ ކުރިއަށް އޮތް ތިން އަހަރުގެ ތެރޭގައި ޕާކިސްތާނަށް ދޫކުރަން ވަނީ ނިންމައިފަ އެވެ.
އައިއެމްއެފުން ދޭން ނިންމި އެހީއާ ގުޅިގެން ޕާކިސްތާނުގެ ބޮޑުވަޒީރު ޝެހްބާޒް ޝަރީފު އެކަމަށް މަރުހަބާ ވިދާޅުވެ، އައިއެމްއެފްގެ ވެރިޔާ ކްރިސްޓަލީނާ ޖޯޖީއާ އަށް ޝުކުރު ވެސް އަދާކުރައްވާފައިވެ އެވެ.
ދުނިޔޭގެ އެންމެ ބޮޑު އެއް މާލީ އިދާރާ އިން ޕާކިސްތާނަށް 7 ބިލިއަން ޑޮލަރުގެ ލޯނެއް ދޭން ނިންމި އިރު، 1958 ގެ ފަހުން އެތަނުން ޕާކިސްތާނަށް 20 އަށް ވުރެ ގިނަ ލޯނު ދޫކޮށްފައިވެ އެވެ.
އައިއެމްއެފުން ބުނީ މި ފަހަރު ދޭން ނިންމި ލޯނުގެ ސަބަބުން މިއީ ޕާކިސްތާންގެ ހަމަޖެހުމަށާއި އިގުތިސާދީ ކުރިއެރުންތަކަށް ވަރަށް ބޮޑު އެހީއަކަށް ވާނެ ކަމަށް ގަބޫލުކުރާ ކަމަށެވެ. އެ ގައުމަށް ބޮޑު ލޯނެއް ދޭން އައިއެމްއެފުން ނިންމީ މުހިއްމު ޝަރުތުތަކަކާ ވެސް އެކީގަ އެވެ.
އޭގެ ތެރޭގައި އިގުތިސާދު ދެމެހެއްޓުމަށް އައިއެމްއެފުން ދީފައިވާ ލަފާގެ މަތިން ވިޔަފާރިތަކާއި އާންމުންގެ އަތާ ޓެކްސްތައް އިތުރު ކުރުން ހިމެނެ އެވެ.