ހައްޖު ކޯޕަރޭޝަނުން ކުރިއަށް ގެންދަން ނިންމާފައިވާ މަޝްރޫއުގެ ޑިޒައިނިން މަސައްކަތްތައް ފަހި ދިރިއުޅުން ކޯޕަރޭޝަން (އެފްޑީސީ) އާ ހަވާލުކޮށްފި އެވެ.
އެކަމުގެ އެއްބަސްވުމުގައި އަންގާރަ ދުވަހު ހައްޖު ކޯޕަރޭޝަނުގެ ފަރާތުން ސޮއިކުރެއްވީ މެނޭޖިން ޑިރެކްޓަރު މުހައްމަދު ޝަކީލެވެ. އެފްޑީސީގެ ފަރާތުން ފަރާތުން ސޮއިކުރެއްވީ މެނޭޖިން ޑިރެކްޓަރު ހަމްދާން ޝަކީލެވެ.
ހައްޖު ކޯޕަރޭޝަނުން ބުނީ "ނިއަމް ރެސިޑެންސް" ގެ ނަމުގައި ކުރިއަށް ގެންދާ މަޝްރޫއަށް ބޭނުންވާ އާކިޓެކްޗަރަލް، އިންޖިނިއަރިން އަދި ކުރެހުންތައް ފޯރުކޮށް ދިނުމާއި، ކޮންސަލްޓެންސީގެ ހިދުމަތް ފޯރުކޮށް ދޭނީ ފަހި ދިރިއުޅުމުން ކަމަށެވެ.
ހައްޖު ކޯޕަރޭޝަނުން ބުނީ އެމްޑީ ހައުސިން ޕްރޮޖެކްޓްގެ ދަށުން ހަދާ އެޕާޓްމަންޓްތައް ގަތުމުގެ ފުރުސަތު އާންމުކޮށް ހުޅުވާލާނެ ކަމަށެވެ. އެ ކަމަކު މި ޕްރޮޖެކްޓްގެ މަސައްކަތް ހަވާލުކުރާ ބަޔަކާއި ހަދަނީ ކިތައް އެޕާޓްމަންޓުކަމާއި މަޝްރޫއާ ގުޅޭ އިތުރު އެއްވެސް ތަފުސީލެއް އަދި ހާމައެއް ނުކުރެ އެވެ.
ހައްޖު ކޯޕަރޭޝަނުން ޙައުސިން ޕްރޮޖެކްޓެއް ކުރިއަށް ގެންދަން ނިންމި އިރު، މި މަހުގެ 14 ވަނަ ދުވަހު ވަނީ ހުޅުމާލޭގައި ކުންފުނީގެ އާ އޮފީސް އިމާރާތުގެ ބިންގާ ވެސް އަޅައިފަ އެވެ. ނުވަ ބުރީ އެ އޮފީސް އިމާރާތުގެ މަސައްކަތް ހަވާލުކޮށްފައިވަ ނީ ކޮންޓްރެކްޓާ ފައިނޭންސް އުސޫލުން 79.1 މިލިއަން ރުފިޔާއަށް މެޑްޓެކް މޯލްޑިވްސް ޕްރައިވެޓް ލިމިޓެޑާ އެވެ.
މަސައްކަތް ހަވާލުކުރީ ދޮޅު އަހަރު ދުވަސް ތެރޭގައި ނިންމާ ގޮތަށެވެ.
ދެހާސް ތޭރައިގައި އުފެއްދި ހައްޖު ކޯޕަރޭޝަކީ ހައްޖާއި އުމްރާ އަށް މީހުން ގެންދާ ސަރުކާރުގެ ކުންފުންޏެވެ.