ސަން ސިޔާމު ވިލު ރީފް ރިސޯޓްގައި ދިވެހިންގެ އިހުގެ ދިރިއުޅުން ދައްކުވައިުދޭ ހާއްސަ ތަނެއް "އަތިރީގެ" ގެ ނަމުގައި ތައްޔާރުކޮށް ހުޅުވައިފި އެވެ.
އެ ރިސޯޓްގެ ބީޗް ސަރަހައްދުގައި ގާއިމުކޮށްފައިވާ ދިވެހިންގެ ސަގާފީ ދިރިއުޅުން ދައްކުވައި ދޭ ތަން ތައްޔާރުކޮށް ވަނީ އިހުގެ ގޭބިސީއަކުން ފެންނާނެ ގިނަ ސިފަތަކެއް ހިމަނައިގެންނެވެ. އެގޮތުން ގޯތީގެ ވަށައިގެން ފަން ފެންސް ޖަހައި، ފަނުން ހިޔާކޮށް ހަދާފައިވާ ގެ އާއި ގެއާ ގުޅުން ހުންނަ އިތުރު ބައިތައް ވިލު ރީފް ރިސޯޓްގެ "އަތިރީގޭ" ގައި ހިމަނާފައިވެ އެވެ.
މީގެ އިތުރުން އެތަނުގައި ދިވެހިންގެ އިހުގެ ދިރިއުޅުން އޮތް ގޮތުގެ ވައްޓަފާޅި އާއި އިހުގައި ބޭނުންކުރި ތަކެއްޗާއި ތަފާތު މަސައްކަތްތައް ކުރަމުން އައި ގޮތް ވެސް ދައްކުވައި ދޭނެ އެވެ.
"އަތިރީގެ" އާ ބެހޭ ގޮތުން ވިލު ރީފް ރިސޯޓުން ބުނީ މިއީ އެ ރިސޯޓަށް ޒިޔާރަތްކުތާ ޓޫރިސްޓުންނަށް ދިވެހިންގެ ސާދާ ދިރިއުޅުން ދައްކުވައި ދީ، ތަފާތު ތަޖުރިބާއެއްކޮށްލުމަށް މަގުފަހިކޮށް ދިނުމުގެ ގޮތުން ތައްޔާރުކުރި ތަނެއް ކަމަށެވެ.
ރާއްޖޭގެ މިހާރުގެ އެންމެ މަގުބޫލު ރިސޯޓްތަކުގެ ތެރޭގައި ހިމެނޭ ސަން ސިޔާމް ވިލު ރީފަކީ 1998 ގައި ހުޅުވި 103 ވިލާ ހިމެނޭ ރިސޯޓެކެވެ.