ބޮލީވުޑްގެ މަޝްހޫރު ދެމަފިރިން ކަމަށްވާ ސައިފް އަލީ ޚާނާއި ކަރީނާ ކަޕޫރް އެކީގައި ފިލްމެއްގައި ވިލަންތަކެއްގެ ރޯލު ކުޅެން އެއްބަސްވެފައިވާ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ އިންޑިއާގެ މީޑިއާތަކުން މިއަދު ބުނީ އެ ފިލްމަކީ މިދިޔަ އަހަރު "އެނިމަލް" ގެނެސްދިން ޑައިރެކްޓަރު ސަންދީޕް ރެޑީ ވަންގާގެ "ސްޕިރިޓް" ކަމަށެވެ. ދެހާސް އެކާވީހުގައި އިއުލާންކުރި މި ފިލްމަކީ ޕްރަބާސް ބަތަލުގެ ރޯލު ކުޅެން ހަމަޖެހިފައިވާ ފިލްމެކެވެ. ރިޕޯޓްތައް ބުނާ ގޮތުން ބުޝަން ކުމާރުގެ ޓީ ސީރީޒުން ޕްރޮޑިއުސްކުރާ ފިލްމުގައި، މި އަހަރު ރިލީޒްކުރި "ކަލްކީ: 2989" ގެ ބަތަކު ކުޅޭނީ ފުލުހެއްގެ ރޯލެވެ.
"ސްޕިރިޓް" ގެ ވިލަންތަކެއްގެ ރޯލަށް ސައިފާއި ކަރީނާ އެއްބަސްވެފައިވާކަމުގެ އަޑުތަކެއް އެރި ނަމަވެސް މިކަން އަދި ކަށަވަރެއް ނުވެ އެވެ. ސައިފާއި ކަރީނާ އެންމެ ފަހުން އެކީގައި ކުޅުނު ފިލްމަކީ 2012 ގެ "އޭޖެންޓް ވިނޯދު" އެވެ. މީގެ ކުރިން ވެސް ސައިފް ބައެއް ފިލްމުތަކުގެ ވިލަންގެ ރޯލު ކުޅެފައިވެ އެވެ.
އޭގެ ތެރޭގައި "ތާނަޖީ: ދި އަންސަންގް ވޮރިއާ" އާއި "އާދިޕުރުޝް" ހިމެނެ އެވެ.
ދާދި ފަހުން ބައެއް މީޑިއާތަކުން ރިޕޯޓްކޮށްފައިވާ ގޮތުގައި "ސްޕިރިޓް" ގެ ކާސްޓްގައި ކެޓްރީނާ ކައިފާއި އައިޝްވާރިއާ ރާއީ ވެސް ހިމެނޭނެ އެވެ. އެކަމަކު ފިލްމުގެ ކާސްޓާ ބެހޭ ގޮތުން ދެކެވޭ މިފަދަ އެއްވެސް ވާހަކައެއް އޭގެ ޓީމުން މިހާތަނަށް ކަށަވަރުކޮށް ދީފައެއް ނުވެ އެވެ.