"ފުވައްމުލައް ޓޫރިޒަމް އެވޯޑްސް" ހަފުލާ މާދަމާ ރޭ އޮންނާނެ ކަމަށް ފުވައްމުލައް ސިޓީ ކައުންސިލުން ބުނެފި އެވެ.
މި އެވޯޑަކީ އެ ސިޓީ އަށް ލޯކަލް ޓޫރިޒަމް ތައާރަފުވިތާ މި އަހަރަށް 10 އަހަރުވެފައިވާތީ އެ ދާއިރާގައި ހަރަކާތްތެރިވާ އެކި ފަރާތްތަކުގެ އަގުވަޒަން ކުރުމުގެ ގޮތުން ކައުންސިލުން އިންތިޒާމުކޮށްގެން ދޭން ނިންމި އެވޯޑެކެވެ. ހަމަޖެހިފައިވާ "ފުވައްމުލައް ޓޫރިޒަމް އެވޯޑްސް 2024" އަށް ކުރިމަތިލާން ވެސް މިހާރު ހުޅުވާލާފައިވާ ކަމަށެވެ.
އެވޯޑް ދޭން ހަމަޖެހިފައި ވަނީ 10 ކެޓަގަރީއަކަށް ކަމަށެވެ.
* އެންމެ ފުރަތަމަ ރަޖިސްޓްރީކުރި ގެސްޓްހައުސް
* އެންމެ ފުރަތަމަ ރަޖިސްޓްރީކުރި ޑައިވް ސެންޓަރު
* ޓޫރިޒަމް ދާއިރާގެ އާންމު ހިދުމަތުގެ އެވޯޑް
* އެންމެ މަގުބޫލު ގެސްޓްހައުސް
* އެންމެ މަގުބޫލު ޑައިވް ސެންޓަރު
* އިންޓަނޭޝަނަލް ފެއާއެއްގައި އެންމެ ފުރަތަމަ ފުވައްމުލައް ޕްރޮމޯޓްކުރި ފަރާތް
* ލީޑިން ގެސްޓްހައުސް
* ލީޑިން ޑައިވް ސެންޓަރު
* ފުވައްމުލަކުގެ އަންޑަވޯޓާ ފޮޓޯގްރަފީ
* ފުވައްމުލަކު ވެށީގެ ފޮޓޯގްރަފީ
ކައުންސިލުން ބުނީ މި ކެޓަގަރީތަކުން އެވޯޑް ދޭނީ އެކަމަށް ހާއްސަކުރާ ކޮމިޓީއަކުން ކުރިމަތިލި މީހުންގެ އިވެލުއޭޓް ކުރުމަށް ފަހު ކަމަށެވެ. އެ ކޮމިޓީގައި އަމިއްލަ ފަރާތްތަކާއި ޓޫރިޒަމް ދާއިރާގެ ސްޓޭކް ހޯލްޓަރުން ހިމެނެ އެވެ. އެވޯޑް ލިބޭ ފަރާތްތައް ކަނޑައަޅާފައި ވަނީ އާންމުންގެ ވޯޓަކަށް ވެސް ރިއާޔަތްކޮށެވެ.
ފުވައްމުލަކުގައި ގެސްޓްހައުސް ވިޔަފާރި ފުޅާވަމުން އަންނަ އިރު، އެ ސިޓީ އަކީ ޑައިވިން އަށް ވެސް ހާއްސަ ތަނެކެވެ.