ސޯޝަލް މީޑިއާގައި ރައީސް ޑރ. މުހައްމަދު މުއިއްޒު އަވަހާރަކޮށްލާނެ ކަމަށް ބުނެ އިންޒާރު ދިން މައްސަލަ ޖުމްހޫރީ ޕާޓީން ކުށްވެރިކޮށްފި އެވެ.
ރައީސް "މަރާލާނެ" ކަަމަށް ބުނެ ފޭސްބުކް މެދުވެރިކޮށް އިންޒާރު ދިން މައްސަލަ ފުލުހުން އަންނަނީ ތަހުގީގު ކުރަމުންނެވެ.
ޖޭޕީން ނެރުނު ބަޔާނެއްގައި ބުނީ މިފަދަ ނުރައްކާތެރި އިންޒާރެއް ޤައުމުގެ ވަލިއްޔުލްޢަމުރަށް ދިނުމަކީ ޤައުމުގެ އަމާންކަން ނަގާލައި، ޤައުމުގައި އޮތް ހަމަޖެހުމާއި ސުލްޙަމަސަލަސްކަން ނެތިކޮށްލައި، ރައްޔިތުންގެ ހިތްތަކުގައި ބިރުވެރިކަން އުފެދިގެންދާފަދަ ނާތަހުޒީބީ އަދި އެހާމެ ދަށުދަރަޖައިގެ ޢަމަލެއް ކަމަށެވެ.
މި އިންޒާރަކީ ހަމައެކަނި އެމަނިކުފާނަށް ދިން އިންޒާރެއް ނޫން ކަމަށާއި އެއީ މުޅި ދިވެހި ޤައުމަށް ދީފައިވާ ބިރުވެރި އިންޒާރެއްކަމަށް ވެސް ޖޭޕީން ބުނެ އެވެ.
"ވީމާ، މި ނުރައްކާތެރި މައްސަލަ ސީރިއަސް މައްސަލައެއްގެ ގޮތުގައި ބަލައި ތަޙުޤީޤުކޮށް، އެ ޢަމަލު ހިންގި ފަރާތާމެދު އަޅަންޖެހޭ ޤާނޫނީ ފިޔަވަޅު އަވަސްކޮށް އެޅުމަށް ދިވެހިރާއްޖޭގެ ތަންފީޒީ އެންމެހާ އިދާރާތަކަށް މި ޕާޓީއިން ގޮވާލަމެވެ،" އެ ބަޔާނުގައިވެ އެވެ.
ޖޭޕީން ވަނީ ރައީސުލްޖުމްހޫރިއްޔާގެ ސަލާމަތާއި ރައްކާތެރިކަން އޭގެ އެންމެ މަތީ ދަރަޖައިގައި ދަމަހައްޓައި އެކަން ކަށަވަރުކުރުމުގެ ފުރިހަމަ ޒިންމާ އާއި މަސްޢޫލިއްޔަތު މަތިކުރެވިފައިވާ މުއައްސަސާތަކާއި އިދާރާ ތަކުން، އެ ފަރާތްތަކުގެ ޤާނޫނީ ވާޖިބު އެންމެ ފުރިހަމަގޮތުގައި އަދާކުރުންމަތީގައި ސާބިތުކަމާއެކު ދެމި ތިބޭނެ ކަމަށް ޔަގީންކުރާ ކަމަށްވެސް ބުނެފަ އެވެ.