ނޮވެމްބަރު މަހު ރިލީޒްކުރަން ހަމަޖެހިފައިވާ އަޖޭ ދޭވްގަންގެ "ސިންގަމް އެގެއިން" ގެ މަންޒަރުތަކެއް ސްރީ ލަންކާގައި ނަގަން ހަމަޖެހިފައިވާ ކަމަށް ރިޕޯޓްތައް ބުނެފި އެވެ.
މީޑިއާތަކުން ބުނީ ޑައިރެކްޓަރު ރޯހިތު ޝެޓީ ފިލްމުގެ ބައެއް ކާސްޓުންނާއި ކްރޫއާ އެކީ އަންނަ ހަފުތާގެ ތެރޭގައި ލަންކާ އަށް ދާނެ ކަމަށާއި އެ ގައުމުގައި ފިލްމުގެ ވަރުގަދަ އެކްޝަން މަންޒަރުތެއް ޝޫޓްކުރާނެ ކަމަށެވެ. އެގޮތުން "ސިންގަމް އެގެއިން" ގެ ވިލަންގެ ރޯލު ކުޅޭ އަރުޖުން ކަޕޫރާއި އަޖޭ އާއި އޭނަގެ ފުލުހުންގެ ޓީމެއްގެ ވަރުގަދަ ކުރިމަތިލުންތަކެއްގެ މަންޒަރުތަކެއް ލަންކާގައި ޝޫޓްކުރާނެ އެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ މި ފިލްމަކީ އަޖޭ ފުލުހެއްގެ ރޯލު ކުޅެމުން އަންނަ "ސިންގަމް" ފްރެންޗައިޒްގެ ތިން ވަނަ ބައެވެ. މީގެ ކާސްޓްގައި ދީޕިކާ ޕަދްކޯން، ޓައިގާ ޝްރޮފް، ކަރީނާ ކަޕޫރް އަދި ޖެކީ ޝްރޮފް ވެސް ހިމެނެ އެވެ.
މީގެ އިތުރުން ރޯހިތުގެ ކޮޕް ޔުނިވާސް އަށް ނިސްބަތްވާ އަނެއް ދެ ފިލްމު ކަމަށްވާ "ސިމްބާ" ގެ ބަތަލު ރަންވީރު ސިންގް އާއި "ސޫރިއަވަންޝީ" ގެ ބަތަލު އަކްޝޭ ކުމާރުގެ ހާއްސަ ފެނިލުންތަކެއް ވެސް "ސިންގަމް އެގެއިން" ގައި ހިމެނޭނެ އެވެ.
މި ފިލްމު ސިނަމާތަކަށް ގެންނާނީ ދިވާލީއާ ދިމާކޮށް ނޮވެމްބަރު 1 ގައި ކަމަށް ބެލެވެ އެވެ.
"ސިންގަމް" 2011 ގައި ގެނެސްދިނުމަށް ފަހު "ސިންގަމް ރިޓާންސް" ގެނެސްދިނީ 2014 ގަ އެވެ. އެ ދެ ފިލްމަކީ ވަރަށް ކާމިޔާބު ދެ ފިލްމެވެ.