މަސްވެރިންނަށް ދޫނުރެވި އޮތް 17 މިލިއަން ރުފިޔާ އަންނަ ހަފުތާގައި ދޫކޮށް ނިންމާނެ ކަަމަށް މިފްކޯ އިން ބުނެފި އެވެ.
އެ ކުންފުނިން މިމަހުގެ ކުރީކޮޅުން ފެށިގެން މަސްދޯނިތަކަށް ދައްކަން އޮތް ބިލްތަކާ ގުޅޭގޮތުން އެ ކުންފުންޏާއި ފިޝަރީޒް މިނިސްޓްރީ އާއި ފިނޭންސް މިނިސްޓްރީން މަޝްވަރާކޮށްފައިވާ ކަމަށެވެ. އެގޮތުން މަސްވެރިންނަށް ދޫކުރަން އޮތް ފައިސާގެ މައްސަލައަށް މި ވަގުތަށް ހައްލު ހޯދިފައިވާ ކަމަށާއި މިފްކޯ އަށް ދޭންޖެހޭ ސަޕޯޓު ފޯރުކޮށް ދިނުމުގައި ސަރުކާރުން ކެނޑިނޭޅި މަސައްކަތް ކުރަމުން އަންނަ ކަމަށް ސަރުކާރުގެ މަސް ކުންފުނިން ބުންޏެވެ.
މިފްކޯ އިން ބުނީ އަމާޒަކީ އަންނަ ހަފުތާގެ ތެރޭގައި މަސްވެރިންނަށް 17 މިލިއަން ރުފިޔާ ދޫކޮށް ނިންމުން ކަމަށެވެ.
މި ސަރުކާރު އައި ފަހުން ކިރުވި މަހަށް މަސްވެރިންނަށް އެކި ފަހަރު މަތިން ބިލިއަނެއްހާ ރުފިޔާ ދޫކޮށްފައިވެ އެވެ. މަސްވެރިންނަށް ފައިސާ ދޫކުރުން ލަސްވެގެން މި ދޭތެރެ އިން މަސްވެރިންތަކެއް ރާއްޖޭގެ ބައެއް ހިސާބުތަކުގައި މުޒާހަރާތަކެއް ވެސް ކޮށްފައިވެ އެވެ.