ދިވެހި ފިލްމު "ކަމަނާ" ތައިލޭންޑްގެ ބެންކޮކްގައި އަޅުވަން ނިންމައިފި އެވެ.
އެ ފިލްމު އުފެއްދި ސެޓާން ސްޓޫޑިއޯ އިން ބުނީ ބެންކޮކްގައި ފިލްމު އަޅުވަން ހަމަޖެހިފައި ވަނީ އަންނަ މަހުގެ 5 ގައި ކަމަށާއި އެ ޝޯގެ ޓިކެޓަށް މިހާރު ހުޅުވާލާފައިވާ ކަމަށެވެ.
"ކަމަނާ" ދާދި ފަހުން އަވަށްޓެރި ސްރީ ލަންކާގައި ވެސް އެޅުވިި އެވެ.
މިދިޔަ މަހުގެ 27 ގައި އޮލިމްޕަހުގައި ޕްރީމިއާކުރި މި ފިލްމަކީ ގެވެށިއަނިޔާގެ މައްޗަށް ބިނާކޮށް މަހުދީ އަހުމަދު ލިޔުނު ސްކްރީންޕްލޭއަކަށް ހުސައިން މުނައްވަރު ޑައިރެކްޓްކުރި ފިލްމެކެވެ. މީގެ ލީޑް ތަރިންނަކީ މަރިޔަމް އައްޒަ އާއި ޔޫސުފް ޝަފީއު (ޔޫއްޕެ) ގެ އިތުރުން އައިނިމަތު ރަޝްފާ (އާޝާ) އެވެ.
އޮލިމްޕަހުގައި އޮގަސްޓް 27 އިން މި މަހުގެ 14 އަށް މުޅިން ވެސް ހައުސްފުލް ޝޯތަކެއް ދެއްކުމަށް ފަހު "ކަމަނާ" ހުޅުމާލޭގެ ޝްވެކް ސިނަމާގައި ވެސް އަންނަނީ ދައްކަމުންނެވެ.
މި ފިލްމު މިހާތަނަށް ވަރަށް ރަށްރަށުގައި ވެސް ދައްކާފައިވާ އިރު، އިތުރު ރަށްރަށުގައި އަޅުވަން ތާވަލު ވެސް ކޮށްފައިވެ އެވެ.