ދުނިޔޭގެ ސުލްޙައާއި ރައްކާތެރިކަން ކަށަވަރުކުރުމަށްޓަކައި ނިއުކްލިއާ ހަތިޔާރު ނައްތާލުމަކީ ކޮންމެހެން ކުރަންޖެހޭ ކަމެއް ކަމަށް އެންވަޔަރަމެންޓް މިނިސްޓަރު ތާރިގު އިބްރާހިމް ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ ނިއުކްލިއާ ހަތިޔާރު މުޅިން ނައްތާލުމާ ގުޅޭ ގޮތުން ބޭއްވުނު މަތީ ފެންވަރުގެ ބައްދަލުވުމުގައި ރައީސް ޑރ. މުޙައްމަދު މުޢިއްޒުގެ ފަރާތްޕުޅުން ބަޔާން އިއްވަވަމުންނެވެ.
މި ބައްދަލުވުމަކީ އދ. ގެ ޖެނެރަލް އެސެމްބްލީގެ ތެރެއިން ކުރިއަށްދިޔަ ބައްދަލުވުމެކެވެ. މިނިސްޓަރ ޠާރިޤް އިއްވި ބަޔާނުގައި، ދުނިޔޭގެ ސުލްޙަ ޤާއިމްކުރުމަށްޓަކައި ނިއުކްލިއާ ހަތިޔާރު ނައްތާލުމުގެ މުހިންމުކަން ފާހަގަކުރެއްވި އެވެ.
"ދުނިޔޭގެ ސުލްޙައާއި ރައްކާތެރިކަން ކަށަވަރުކުރުމަށްޓަކައި ނިއުކްލިއާ ހަތިޔާރު ނައްތާލުމަކީ ކޮންމެހެން ކުރަންޖެހޭ ކަމެއް," ޠާރިޤް ވިދާޅުވި އެވެ.
ރާއްޖެއަކީ އަބަދުވެސް ނިއުކްލިއާ ހަތިޔާރު ނައްތާލުމަށް ގޮވާލާ ޤައުމެއްކަން ފާހަގަކޮށް، މި މަސައްކަތުގައި ބައިނަލްއަޤްވާމީ މުޖުތަމަޢުގެ އެއްބާރުލުން މުހިންމު ކަމަށްވެސް ވިދާޅުވި އެވެ.
މި ބައްދަލުވުމުގައި ބައިވެރިވި އެހެން ޤައުމުތަކުގެ ވެރިންނާއި މަންދޫބުން ވެސް ނިއުކްލިއާ ހަތިޔާރުގެ ނުރައްކާތެރިކަމާއި، އެ ހަތިޔާރު ނައްތާލުމުގެ މުހިންމުކަން ވަނީ ފާހަގަކޮށްފަ އެވެ.