މިދިޔަ މަހު އޮލިމްޕަހުގައި އެޅުވި ލޯބީގެ ބިރުވެރި ފިލްމު "ސާޔާ" އަންނަ މަހު އައްޑޫ މަރަދޫގައި އަޅުވަން ނިންމައިފި އެވެ.
އެ ފިލްމުގެ ދެ ޝޯއެއް އަވަށު ބޮޑޮގޭގައި އޮންނާނީ އަންނަ މަހުގެ 10 އާއި 11 ގަ އެވެ. މި މަހުގެ 5 ވަނަ ދުވަހުގެ "ސާޔާ" ޝޯއެއް ހުޅުމީދޫގައި ވެސް ދައްކާފައިވެ އެވެ. އެއީ އަވަށު ޖަމިއްޔާއެއް ކަމަށްވާ މުލިމަތި ޔުނައިޑެޓާއި ފިލްމު އުފެއްދި ޝައި ޕްރޮޑަކްޝަން ގުޅިގެން އިންތިޒާމުކުރި ޝޯއެކެވެ.
މި ފަހަރު މަރަދޫގައި "ސާޔާ" އަޅުވަނީ ހިތަދޫގެ ޖަމިއްޔާއެއް ކަމަށްވާ ގްރީން އާޓްސް އާއި ޝައި ޕްރޮޑަކްޝަން ގުޅިގެންނެވެ. އެ ޖަމިއްޔާ އިން އަންނަ މަހު ބޮޑޮގޭގައި "ކަމަނާ" ގެ ޝޯތަކެއް ވެސް ދައްކަން ވަނީ ނިންމައިފަ އެވެ. އެއީ އަންނަ މަހުގެ 3 އާއި 4 ގަ އެވެ.
މި ފިލްމުގެ ދެ ޝޯއެއް ގްރީން އާޓްސް އިން މި މަހުގެ 19 އާއި 20 ގައި ގަމުގެ ބްލޫ ލެގޫންގައި ދައްކާފައިވެ އެވެ.
އޮގަސްޓް މަހުގެ 7 ގައި އޮލިމްޕަހުގައި ޕްރީމިއާކުރި "ސާޔާ" އަކީ ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށް މުހިއްމު ރޯލެއް ކުޅުނު ފިލްމެކެވެ. މީގެ އިތުރު ކާސްޓުންނަކީ އައިމިނަތު ރަޝްފާ (އާޝާ) އާއި އިބްރާހީމް ޖިހާދު (ޖިމީ) އެވެ.