މިއީ ޒުވާނުން ޓޫރިޒަމަށް އިންވެސްޓްކުރަންވީ ވަގުތު ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.
ބައިނަލްއަގްވާމީ ޓޫރިޒަމް ދުވަހުގެ މުނާސަބަތާ ގުޅުވައިގެން، ފުވައްމުލަކު ސިޓީ ކައުންސިލުން ބޭއްވި "ފުވައްމުލައް ޓޫރިޒަމް އެވޯޑު 2024" ގެ ހަފުލާގައި ވާހަކަދައްކަމުން ފައިސަލް ވިދާޅުވީ މިއަދު މިއީ ދިވެހި ޒުވާނުން ނިކުމެ ވަރަށް ކެރިގެން ރާއްޖޭގެ ފަތުރުވެރިކަމުގެ ސިނާއަތަށް ވަދެ އިންވެސްޓްކުރަންވީ ވަގުތު ކަމަށެވެ.
"މިއަދު އިންވެސްޓްކޮށްފި ކަމަށްވާނަމަ މީގެ 20-25 އަހަރު ފަހުން ތިބޭފުޅުންނަކީ ޕްރައިވެޓް އައިލެންޑުގެ ގޮތުގައި 50 މިލިއަން ޑޮލަރު، 100 މިލިއަން ޑޮލަރުގެ އިންވެސްޓް ރާއްޖޭގެ ޓޫރިޒަމް ސިނާއަތުގައި އެ ދުވަހުން ކުރެވޭނެ،" ފައިސަލް ވިދާޅުވި އެވެ.
ފައިސަލް ވިދާޅުވީ ކުޅަދާނަ އަދި ހުނަރުވެރި ޒުވާން ޖީލެއް ރާއްޖޭގައި އެބައޮތް ކަމަށާއި ސަރުކާރުން ބޭނުންވަނީ އެ ފަރާތްތަކަށް ފުރުސަތުތައް ފަހިކޮށްދިނުން ކަމަށެވެ. މިއަދުގެ ރައީސުލްޖުމްހޫރިއްޔާ އަކީ އިލްމީ ގޮތުން ވަރަށް ގާބިލު އަދި އެމަނިކުފާނާ އެކީ މަަސައްކަތް ކުރައްވާ ބޭފުޅުންނަކީ އެމަނިކުފާނު ބޭނުންވާ އަމާޒަށް ރާއްޖެ ގެންދިޔުމަށް މަސައްކަތް ކުރައްވާ ބޭފުޅުން ކަމަށްވެސް ވިދާޅުވި އެވެ.
މީގެއިތުރުން ޓޫރިޒަމް ނެތް ތަންތަނުގައި ޓޫރިޒަމް ތަރައްގީ ކުރުމަކީ ސަރުކާރުގެ އަމާޒެއް ކަމަށާއި މިއީ ވަގުތު ނަގައިގެން ޕްލޭން ކުރެވިގެން ކުރެވޭނެ ކަންކަން ކަމަށް ފައިސަލް ވިދާޅުވި އެވެ.
"އަޅުގަނޑު މިހުރީ ވަރުބަލިކަމެއް ނެތި ތި ބޭފުޅުންގެ އަޑުއަހައިގެން، ތިބޭފުޅުން ބޭނުންވާ ކަންކަން ސަރުކާރު ތެރެއިން ކޮށްދިނުމުގައި." ފައިސަލް ވިދާޅުވި އެވެ.
ދެކުނުގައި ޓޫރިޒަމް ފުޅާކުރުމަށް ވެސް ސަރުކާރުން މަސައްކަތް ކުރަމުން އަންނަ ކަމަށާއި އެގޮތުން ޗައިނާ އިން ޗާޓަރު ފްލައިޓްތަކެއް އެ ސަރަހައްދަށް ގެންނަން މަސައްކަތް ކުރާ ކަމަށްވެސް ފައިސަލް ވިދާޅުވި އެވެ.