ވެރިކަން ކުރާ ޕީޕަލަސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބު ފަސްކޮށްފި އެވެ.
ޕީއެންސީން ބުނީ އަންނަ މަހު 19ގައި ބޭއްވުމަށް ހަމަޖެއްސި އެތެރޭގެ އިންތިހާބު ނޮވެމްބަރަށް ފަސްކޮށްފައިވާ ކަމަށެވެ. އަދި އިންތިޚާބަށް ކުރިމަތިލުމުގެ ޝައުގުވެރިކަން ހުރި ޕާޓީގެ މެންބަރުންނަށް އެކަމަށް އެދި ހުށަހެޅުމަށް ދީފައިވާ މުއްދަތު ވެސް އޮކްޓޫބަރު 24 އަށް އިތުރުކޮށްފައިވާ ކަމަށް ޕީއެންސީން ބުނެ އެވެ.
އެ ޕާޓީން ބުނީ ދާއިރާތަކުގެ އިންތިޚާބު ބާއްވާ ތާރީހާއި ކުރިމަތިލުމުގެ މުއްދަތު އިތުރުކޮށްފައިވަނީ މަގާމުތަކަށް ޝައުގުވެރިވާ ގިނަ ފަރާތްތަކުން އެ ކަމަށް އެދެމުން ގެންދާތީ ކަމަށެވެ.
މި އިންތިހާބުގައި އިންތިހާބުކުރަން ހަމަޖެހިފައިވާ މަގާމުތަކުގެ ތެރޭގައި ދާއިރާތަކުގެ ރައީސުންނާއި ނައިބުރައީސުންނާއި ޒުވާނުން ހަރަކާތުގެ ރައީސް އާއި އަންހެނުން ހަރަކާތުގެ ރައީސްގެ އިތުރުން ސްޓިއަރިން ކޮމެޓީގެ މެމްބަރުން ހިމެނެ އެވެ.
އިލެކްޝަންސް ކޮމިޝަންގެ ސިޔާސީ ޕާޓީތަކުގެ ދަފްތަރުގައިވާ ގޮތުން މި މަހުގެ 19 ގެ ނިޔަލަށް ޕީއެންސީގައި ތިބީ 28،983 މެންބަރުންނެވެ. ޕީއެންސީއާ ގުޅިގެން މަސައްކަތް ކުރަމުންދާ ޕީޕީއެމްގެ މެންބަރުންގެ އަދަދު އުޅެނީ 34،698 ގަ އެވެ.