ވައްކަމުގެ ރެކޯޑްތަކެއް އޮންނަ އަންހެނަކު ފޭރުގެ މައްސަލައެއްގައި ހައްޔަރުކޮށްފި އެވެ.
އެ މައްސަލައިގައި ހައްޔަރުކޮށް ބަންދާ މެދު ގޮތެއް ނިންމަން އިއްޔެ ކްރިމިނަލް ކޯޓަށް ހާޒިރު ކުރުމުން ބަންދަށް 7 ދުވަސް ޖެހީ
ހ. ޗިކްކާކޭލް، ފާތުމަތު އިޝާމާ، 41، ގެ މައްޗަށެވެ. އޭނަގެ ހައްޔަރުކުރީ ހުއްދަ ނެތި ތަނަކަށް ވަދެ ފޭރުމުގެ އަމަލެއް ހިންގާފައިވާތީ ނެވެ. އަދި އިޝާމާ ތޫނު އެއްޗެއް ގެންގުޅުނު ކަމަށާއި ފޭރެން އަނިޔާވެރިކަން އިސްކުރިކަމަށް ވެސް އަމުރުގައިވެ އެވެ.
އިޝާމާގެ ބަންދަށް މުއްދަތު ޖެހީ އޭނަ ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވެދާނެ ކަމަށް ނިންމައިފަ އެވެ.
ފަހަކަށް އައިސް މާލޭގައި ވައްކަމާއި ފޭރުގެ މައްސަލަތައް ވަރަށް ގިނަ އެވެ. އަދި މިފަދަ ކަންކަމުގައި ޝާމިލުވާ އަންހެނުން އިތުރުވަމުންދާކަން ފާހަގަކުރެވެ އެވެ.