ރާއްޖޭގެ މަޝްހޫރު ކުލަބެއް ކަމަށްވާ މާޒިޔާ ސްޕޯޓްސް އެންޑް ރެކްރިއޭޝަނަށް ފަލަސްތީނަށް ނިސްބަތްވާ ފުޓްބޯޅަ ކުޅުންތެރިޔަކު ސޮއިކޮށްފި އެވެ.
އެ ޓީމާ ގުޅުނު ކުޅުންތެރިޔަކީ ފަލަސްތީނުގެ ގައުމީ ޓީމުގެ މިޑްފީލްޑަރު ޖޮނަތަން ކެންޓިލާނާ އެވެ. ޗިލީ އަށް އުފަން 32 އަހަރުގެ ޖޮނަތަން ވަނީ ފަލަސްތީނާއި މެލޭޝިއާ އާއި މިސްރު އަދި އިންޑޮނޭޝިއާގެ ކުލަބުތަކަށް ކުޅެފަ އެވެ. އޭނަ އަކީ 2015 އިން އަހަރުން ފެށިގެން ފަލަސްތީނުގެ ގައުމީ ޓީމުގައި ކުޅުންތެރިއެކެވެ. އެގޮތުން މިހާތަނަށް ފަލަސްތީނަށް 30 މެޗް ކުޅެ، 10 ގޯލު ކާމިޔާބުކޮށް ދީފައިވެ އެވެ.
މާޒިޔާ އިން ބުނީ ޖޮނަތަން އަކީ އެ ކުލަބްގެ ސްކޮޑް ވަރުގަދަ ކުރަން އިތުރުވި ވަރަށް މުހިއްމު ބައިވެރިއެއް ކަމަށެވެ.
ފަލަސްތީނުގެ ގައުމީ ޓީމްގައި ހިމެނޭ ޖޮނަތަން ފަލަސްތީނަށް ނިސްބަތް ވަނީ އޭނަގެ ބައްޕަގެ އާއިލާގެ ފަރާތުންނެވެ.