އިންޑިއާގެ ބަތަލާ މޯނީ ރޯއިގެ 38 ވަނަ އުފަން ދުވަސް ފާހަގަކުރަން ރާއްޖެ އަތުވެއްޖެ އެވެ.
އޭނަގެ އުފަން ދުވަހަކީ މިއަދެވެ. އުފަން ދުވަސް ފާހަގަކުރަންް ރާއްޖެ އަށް ކުރާ ދަތުރުގެ ބައެއް ފޮޓޯތައް މޯނީގެ އިންސްޓަގްރާމްގައި ވެސް ޕޯސްޓްކޮށްފައުވެ ވެ އެވެ. މި ދަތުރުގައި ފިރިމީހާ ސޫރަޖް ނަމްބިއާ އާއި ބައެއް އެކުވެރިން ވެސް ބައިވެރިވެ އެވެ. މޯނީގެ އުފަން ދުވަސް ފާހަގަކުރަނީ ކޮކޯ ޕާމް ބޮޑު ހިތި ރިސޯޓްގަ އެވެ.
އޭނަ މީގެ ކުރިން ވެސް ރާއްޖެ އަށް އެކި ފަހަރު މަތިން ޒިޔާރަތްކޮށްފައިވެ އެވެ.
މި އަހަރުގެ ކުރީކޮޅުން ފެށިގެން އިންޑިއާގެ ޓޫރިސްޓުން އަދި ހާއްސަކޮށް އެ ގައުމުގެ ފިލްމީ ތަރިން ރާއްޖެ އަށް އައުން ވަރަށް ބޮޑަށް މަދުވެފައިވީ ނަމަވެސް މިހާރު ރާއްޖެ އަންނަ ފިލްމީ ތަރިން އަންނަނީ އަނެއްކާ ވެސް އިތުރުވަމުންނެވެ.
އިންޑިއާ އަކީ މިހާރު ރާއްޖެ އަށް 6 ވަނަ އަށް އެންމެ ގިނަ ޓޫރިސްޓުން އަންނަ ގައުމެވެ. މިދިޔަ އަހަރު އެންމެ ގިނަ ޓޫރިސްޓުން އައީ އެ ގައުމުންނެވެ.
ޓީވީ ސިލްސިލާތަކުން މަޝްހޫރުކަން ހޯދި މޯނީގެ އެންމެ ފަހުގެ ފިލްމަކީ ޖޫންގައި ގެނެސްދިން "ބްލެކްއައުޓް" އެވެ. އަދި މިދިޔަ މަހު ރިލީޒްކުރި ޖޯން އަބްރަހަމްގެ "ވޭދާ" ގެ އައިޓަމް ލަވައަކުން ވެސް މޯނީ ފެނިފައިވެ އެވެ.