ބޭރުން އަންނަ ޓޫރިސްޓް އުޅަނދުތަކުގެ އެޖެންޓުކަން ހަމައެކަނި ދިވެހި ކުންފުނިތަކަށް ލިބޭ ގޮތަށް ގަވައިދު އިސްލާހުކޮށްފި އެވެ.
އެގޮތުން އާ އިސްލާހުގެ ދަށުން ޕެސެންޖާ ލައިސެންސް ފީގެ ގޮތުގައި ކޮންމެ ފަސިންޖަރަކަށް އެ އުޅަނދަކުން 5 ޑޮލަރު ނުވަތަ (77ރ. ދައްކަން ޖެހޭނެ އެވެ.
ޓޫރިޒަމް މިނިސްޓްރީން 'ދިވެހިރާއްޖެ އަށް އަންނަ ބޭރުގެ ޓޫރިސްޓު އުޅަނދުފަހަރު ރާއްޖޭގައި ސަރަހައްދުގައި ދުއްވުމާއި ބަނދަރުކުރުމާ ބެހޭ ގަވައިދު' އަށް ގެނައި އިސްލާހުގައިވާ ގޮތުން، ބޭރުގެ ޓޫރިސްޓު އުޅަނދަކަށް ރާއްޖެ އާދެވޭނީ، އެ އުޅަނދުގެ ކަންކަމާ ހަވާލުވާނެ އެޖެންޓަކު ރާއްޖޭގައި ހަމަޖެއްސުމަށް ފަހު އެވެ. އަދު އެޖެންޓުކަން ކުރެވޭނީ އެކަމަށްޓަކައި ކަނޑައެޅިފައިވާ ގަވައިދުގެ ދަށުން ރާއްޖެ އަންނަ ބޭރުގެ އުޅަނދުފަހަރުގެ އެޖެންޓުކަން ކުރުމުގެ ހުއްދަ، ކަސްޓަމްސްއިން ދީފައިވާ ފަރާތްތަކަށެވެ.
މި އިސްލާހުގެ ދަށުން ޓޫރިސްޓު އުޅަނދެއްގެ އެޖެންޓުކަމާ ހަވާލުވެވޭނީ ހިއްސާދާރުންގެ ގޮތުގައި ހަމައެކަނި ދިވެހި ރައްޔިތުން ތިބި ކުންފުނިތަކަށްވުމާއި އެފަދަ ކުންފުންޏެއްގެ ހިއްސާދާރުންގެ ގޮތުގައި ކުންފުންޏެއް ނުވަތަ ޕާޓްނަޝިޕެއް ނުވަތަ ޕާޓްނަޝިޕެއްގެ ނުވަތަ ސޯލް ޕޮރޮޕްރިއޭޓާޝިޕެއްގެ ބައިވެރިންގެ ގޮތުގައި ތިބެންވާނީ ވެސް ހަމައެކަނި ދިވެހިންނަށް ވާން ޖެހެ އެވެ. އަދި
ކުރިން 'ޗާޓާ ލައިސަންސް' ގެ ނަމުގައި ދެމުން އައި ލައިސެންސް 'ޕެސެންޖާ ލައިސެންސް'ގެ ނަމަށް ބަދަލުކޮށް، އިތުރު ފީއެއް ނަގާ ގޮތަށް ވެސް ގަވާއީދަށް ބަދަލު ގެނެސްފައިވެ އެވެ.
ޕެސެންޖާ ލައިސެންސަކީ އެ އުޅަނދެއްގެ ފަޅުވެރިން ފިޔަވައި ފަސިންޖަރުންގެ ގޮތުގައި އިތުރު ބަޔަކު އެ އުޅަނދަށް އަރުވައިގެން އުޅަނދެއް ދުއްވުމަށް ހޯދަން ޖެހޭ ލައިސެންސެކެވެ. އެ ލައިސެންސް ދޫކުރަނީ، ހުށަހަޅަން ޖެހޭ ލިޔެކިޔުންތައް ހުށަހަޅައި އުޅަނދުގެ ކުޑަ ބޮޑު މިނަށް ބަލައި ދުވާލަކަށް ކޮންމެ ފަތުރުވެރިއަކު ދައްކަން ޖެހޭ ފީ ދެއްކުމުންނެވެ.
މީގެ އިތުރަށް ނަގާ ފީއަކީ އުޅަނދަށް އަރާ ކޮންމެ ފަސިންޖަރަކަށް 5 ޑޮލަރުގެ ރޭޓުން އުޅަނދު ފުރުމުގެ ކުރިން ދައްކަން ޖެހޭ ފީއެކެވެ.