ދުނިޔޭގެ އެންމެ ކާރޫބާރޫ ބޮޑު އެއާޕޯޓް ކަމަށްވާ ދުބާއީ އިންޓަނޭޝަނަލް އެއާޕޯޓްގައި ނުކުޅެދުންތެރިކަން ހުންނަ މީހުންނަށް ހާއްސަ ލައުންޖެއް ހުޅުވައިފި އެވެ.
އޯޓިޒަމް ހުރުމާއި ފެނުމާއި އިވުން ފަދަ ކަންކަމުން މަހުރޫމުވެފައިވާ ދަތުރުވެރިންނަށް ހާއްސަކޮށްގެ ހުޅުވި ލައުންޖްގެ ނަމަކީ "އެސިސްޓެޑް ޓްރެވެލް ލައުންޖް" އެވެ. ވަރަށް ޖާގަ ތަނަވަސްކޮށް އަދި ތަފާތު ނުކުޅެދުންތެރިން ހުންނަށް މީހުންނަށް ބޭނުންވާ ހިދުމަތްތައް ފަސޭހަކޮށް ހޯދޭނެ އިންތިޒާމުތަކާ އެކީ ގާއިމުކުރި ލައުންޖް ސިފަކޮށްފައި ވަނީ "ސްޓްރެސް ރިލީފް އޭރިއާ" އެއްގެ ގޮތުގަ އެވެ.
މި ލައުންޖް ހަދާފައި ވަނީ ދުބާއީ އިންޓަނޭޝަނަލް ޓާމިނަލް 2 ގަ އެވެ. އަދި ލައުންޖް އޮޕަރޭޓްކުރަނީ ދުބާއީ އެއާޕޯޓްސްއާ ގުޅިގެން ޑިނާޓާއިންނެވެ.
ދުބާއީ އިންޓަނޭޝަނަލް އެއާޕޯޓްގައި ނުކުޅެދުންތެރިކަން ހުންނަ މީހުންނަށް ހާއްސަކޮށްގެން ހުޅުވި ލައުންޖަކީ އެއާޕޯޓެއްގައި ހުލޫވި މިފަދަ ފުރަތަމަ ލައުންޖެވެ.
ދުބާއީ އެއާޕޯޓްސް އިން ބުނީ މިއީ މިފަދަ ކައުންޖްތައް ގާއިމުކުރަން ކުރިއަށް ގެންދާ ބޮޑު މަޝްރޫއެއްގެ ފުރަތަމަ ތަން ކަމަށެވެ. އެގޮތުން ދުބާއީ އިންޓަނޭޝަނަލް އެއާޕޯޓްގެ އިތުރު ޓާމިނަލްތަކުގައި ވެސް "އެސިސްޓެޑް ޓްރެވެލް ލައުންޖް" ހުޅުުވަން ވަނީ ނިންމައިފަ އެވެ.
މިކަމާ ބެހޭ ގޮތުން ދުބާއީ އެއާޕޯޓްސްގެ ސީއީއޯ މާޖިދު އަލް ޖާކަރް ވިދާޅުވީ މިއީ ދުބާއީ އިންޓަނޭޝަނަލް އެއާޕޯޓަކީ "އިންކްލޫސިވް" ތަނަކަށް ހަދައި، ހުރިހާ ޒާތެއްގެ ދަތުރުވެރިންނަށް ވެސް ހިތްހަމަޖެހުން ގެނުވައި ދޭނެ ތަނަކަށް ހެދުމުގެ ބޭނުމުގައި ފެށި މަޝްރޫއެއް ކަމަށެވެ.
"އެހެންވީމަ މިއީ ހިދުމަތަށް ގެނެވޭ ބޭނުންތެރި މުހިއްމު ބަދަލެއް." އޭނަ ވިދާޅުވި އެވެ.