ރަށްރަށުގައި ކުށްމަދުކުރުމަށް ހިންގާ "ސޭފްޓީ އެންޑް ސެކިއުރިޓީ ކޮމިޓީ" ގެ މަސައްކަތް ރަސްމީކޮށް ފަށައިފި އެވެ.
އެ ކޮމިޓީ އިއްޔެ އިފުތިތާހުކޮށް ދެއްވީ ތިނަދޫ ސިޓީގައި ބޭއްވި ރަސްމިއްޔާތެއްގައި ހޯމްލޭންޑް މިނިސްޓްރީގެ ސްޓޭޓް މިނިސްޓަރު ލުބުނާ މުހައްމަދު ޒާހިރު ހުސައިނެވެ.
މި މަޝްރޫއުގެ ދަށުން ހޯމް މިނިސްޓްރީން ގދ. އަތޮޅުގެ 8 ރަށު ކައުންސިލާއި ތިނަދޫ ސިޓީ ކައުންސިލާއެކު އެމްއޯޔޫއެއްގައި ސޮއިކޮށްފައިވެ އެވެ.
މި އެއްބަސްވުމުގެ މަގުސަދަކީ ކުށް މަދުކުރުމަށް ކުރަން ޖެހޭ މަސައްކަތް ދެނެގަތުމާއި، ރަށުގެ ސަލާމަތާއި ރައްކާތެރިކަމުގެ ހާލަތާ ގުޅޭ ގޮތުން މިނިސްޓްރީ އަށް ލަފާ އެރުވުމެވެ. އަދި ރަށުގެ ކުށްމަދުކުރުމަށް އެ ރަށެއްގެ މާހައުލުގައި ހިމެނޭ ފަރާތްތަކާ އެކު މަސައްކަތް ކުރުމަށް ކޮމިޓީތަކެއް އެކުލަވާލުމެވެ.
މިނިސްޓްރީން ބުނީ މިއީ ކުށްމަދު ކުރުމަށް ރަށު ރައްޔިތުން އެކުލެވޭގޮތަށް އެއްބަސްވުންތަކެއްގެ ދަށުން މަސައްކަތް ކުރެވޭ ފުރަތަމަ ފަހަރު ކަމަށާއި އަމާޒަކީ ރާއްޖޭގެ ހުރިހާ ކައުންސިލްތަކާ އެކީ ވެސް އެއްބަސްވުން ހަދައި ކޮމިޓީތައް އެކުލަވާލުން ކަމަށެވެ.
ތިނަދޫ މޭޔަރު ސައުދު އަލީ ވިދާޅުވީ މިފަދަ މަސައްކަތެއް ފެށުމަކީ މުހިންމުކަމެއް ކަމަށާއި ކުށުގެ ވެށީގައި އުޅޭ ޒުވާނުން އަނބުރާ މުޖްތަމަޢު އަށް ގެނައުމަށް ގުޅު ންހުރި ހުރިހާ އިދާރާއަކުން އެކުގައި މަސައްކަތް ކުރަން ޖެހޭ ކަމަށެވެ.