އާރްއެސްޑަބްލިޔު ސިސްޓަމް ނުވަތަ ލޮނުފެނުން މަސް ފިނިކުރާ ނިޒާމު އެޅުމަށް ދޫކުރަން ނިންމާފައިވާ ލޯނު މަޝްރޫއުގެ ދަށުން 100 ވަރަކަށް ދޯނީގައި އެ ނިޒާމު ގާއިމު ކުރަން ލޯނު ދެވޭނެ ކަމަށް ފިޝަރީޒް މިނިސްޓްރީން ބުނެފި އެވެ.
މި ލޯނަށް ހުޅުވާލާފައވާ އިރު، މިކަމާ ގުޅޭ މަޢުލޫމާތު، ގއ. ގެމަނަފުށި އޮޑިވެރިންނަށާއި މަސްވެރިންނަށާއި ކައުންސިލު މުވައްޒަފުންނަށް، ދިނުމަށް މިއަދު ވަނީ ބައްދަލުވުމެއް ވެސް ބާއްވައިފަ އެވެ.
މިނިސްޓްރީން ވަނީ ލޯނު މަޝްރޫއާ ގުޅޭ މައުލޫމާތު އެކި ހިސާބުތަކަށް ދޭން ނިންމައިފަ އެވެ.
ފިޝަރީޒް މިނިސްޓްރީން ބުނި ގޮތުގައި މަޝްރޫޢުގެ ދަށުން 100 ވަރަކަށް ދޯނީގައި އާރްއެސްޑަބްލިޔު ސިސްޓަމް އެޅުމަށް ލޯނު ދޫކުރުމަށް ހަމަޖެހިފައިވާ އިރު، ލޯނު ދެއްކުމަށް 10 އަހަރގެ މުއްދަތެއް ދޭނެ އެވެ. އަދި އާރްއެސްޑަބްލިއު ސިސްޓަމާއި ޖަނަރޭޓަރާއި ސޯލާ ގަތުމަށް ހޭދަކުރާ އަގުގެ 35 ޕަސެންޓް އޮޑިވެރިން އަނބުރާ ދައްކާކަށް ނުޖެހޭނެ އެވެ.
މި ލޯނު ދޫކުރަން ނިންމާފައި ވަނީ އިސްލާމީ ޝަރީޢާ ހަމަތަކުގެ މަތިން ތަކެތި ގަތް އަގާއި އަގަށް ފައިދާގެ ގޮތުގައި ލާ މިންވަރު ކަނޑައަޅައިގެން ކުރިޔަށް ގެންދާ ގޮތަށެވެ.
މިނިސްޓްރީން ބުނީ އާރްއެސްޑަބްލިޔު ސިސްޓަމް ފެސިލިޓީ އަށް ހަ މަސްދުވަހުގެ ގްރޭސް ޕީރިއަޑެއް ވެސް ލިބޭނެ ކަމަށެވެ.
މިނިސްޓްރީން ބުނެފައިވާ ގޮތުގައި މި މަޝްރޫއުގެ ދަށުން 700،000ރ. އިން ފެށިގެން 2،000،000ރ. އާ ހަމައަށް ލޯނު ދޫކުރާނެ ކަމަށެވެ. ލޯނަށް އެދުމުގެ ފުރުސަތު ހުޅުވާލާފައި ވަނީ ނޮވެމްބަރު 30 ގެ ނިޔަލަށެވެ.