އިޒްރޭލުން ލުބްނާނުގެ ވެރިރަށް ބެއިރޫތަށް އިއްޔެ ދިން ވައިގެ ހަމަލާތަކެއްގައި ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އަވަހާރަކޮށްލައިފި އެވެ.
ހިޒްބުﷲ އިން މިއަދު ނެރުނު ބަޔާނެއްގައި ބުނީ ނަސްރުﷲ އާއެކު އެ ޖަމާއަތުގެ އެހެން ލީޑަރުންތަކެއް ވެސް މި ހަމަލާގައި އަވަހާރަކޮށްލާފައިވާ ކަމަށެވެ.
މި ހަމަލާގައި އިސް ލީޑަރުންތަކެއް އަވަހާރަކޮށްލި ނަމަވެސް ފަލަސްތީނުގެ ގާޒާ އާއި ލުބްނާނުގެ ދިފާއުގައި ދުޝްމަނުންނާއި ކުރިމަތިލުމުގައި އެ ޖަމާއަތް ދެމި އޮންނާނެ ކަމަށް ހިޒްބުﷲ އިން ބުނެފައިވެ އެވެ.
ފާއިތުވި ދުވަސްތަކުގައި ހިޒްބުﷲ ޖަމާއަތުގެ މީހުން އުޅޭ ސަރަހައްދުތަކަށް ކަމަށް ބުނެ އިޒްރޭލުން ވަނީ ލުބްނާނަށް ވައިގެ ވަރުގަދަ ހަމަލާތަކެއް ދީފަ އެވެ. އެގޮތުން މިދިޔަ އަންގާރަ ދުވަހު އިޒްރޭލުން ލުބްނާނުގެ ދެކުނުގެ ސަރަހައްދުތަކަށް ދިން ވައިގެ ހަމަލާތަކުގައި 500 އަށް ވުރެ ގިނަ މީހުން ވަނީ މަރުވެފަ އެވެ. އަދި އިއްޔެގެ އެކި ވަގުތުތަކުގެި ބެއިރޫތަށް ވެސް ވައިގެ ގިނަ ހަމަލާތަކެއް ފޮނުވާލާފައިވެ އެވެ.
މި ހަމަލާތަކުގެ ރައްދުގައި ހިޒްބުﷲ އިން ވެސް އަންނަނީ އިޒްރޭލުގެ އުތުރާއި ދެކުނުގެ ބައެއް ސަރަހައްދުތަކަށް ވައިގެ ހަމަލާތައް ދެމުންނެވެ.
އިޒްރޭލާއި ހިޒްބުﷲ އިން ހަމަލާތައް ބަދަލުކުރަމުންދާއިރު، މި މަހުގެ ކުރީކޮޅު ހިޒްބުﷲ މެންބަރުންގެ ޕޭޖަރުތައް ގޮވުމުގެ ހާދިސާތަކެއް ވެސް ހިނގާފައިވެ އެވެ. ހިޒްބުﷲ އިން ވަނީ މިއީ އިޒްރޭލުން ދުރާލައި ރާވައިގެން ދީފައިވާ ހަމަލާއެއް ކަމަށް ތުހުމަތުކޮށްފަ އެވެ. މި ހަމަލާތަކުގައި 37 މީހަކު މަރުވެފައިވާއިރު، 287 މީހަކު ތިބީ ސީރިއަސް ހާލަތުގަ އެވެ.