ޑައިރެކްޓަރު ރާޖްކުމާރު ސަންތޯޝީ ޑައިރެކްޓްކުރާ ގޮތަށް އަދި އާމިރު ޚާން ޕްރޮޑިއުސްކުރާ ގޮތަށް ހަމަޖެހިފައިވާ ދެވަނަ ފިލްމަކީ "ޗާރު ދިން ކީ ޒިންދަގީ" ކަމަށް ރިޕޯޓްތައް ބުނެފި އެވެ.
އެ ދެ މީހުން އެކީގައި ގެނެސްދޭނެ ފުރަތަމަ ފިލްމަކީ އަންނަ އަހަރު ރިލީޒްކުރަން ހަމަޖެހިފައިވާ "ލާހޯރް، 1947" އެވެ. އާމިރުގެ އަމިއްލަ ކުންފުނިން ޕްރޮޑިއުސްކޮށްފައިވާ މި ފިލްމުގެ ތަރިންނަކީ ސަނީ ޑިއޯލް އާއި ޕްރިތީ ޒިންތާ އެވެ. "ލާހޯރް، 1947" ގެ ޝޫޓިން ދާދި ފަހުން ވަނީ ނިންމާލައިފަ އެވެ.
ޕިންކްވިލާ އިން ބުނީ އާމިރާއި ސަންތޯޝީ މިހާރު ތައްޔާރު ވަނީ އަންނަ އަހަރުގެ ތެރޭގައި "ޗާރު ދިން ކީ ޒިންދަގީ" ގެ ޝޫޓިން ފަށަން ކަމަށެވެ. މި ކޮމެޑީ އަކީ އާމިރު ޕްރޮޑިއުސްކުރުމުގެ އިތުރަށް ކުޅޭނެ ފިލްމެއް ކަމަށް ވެސް އެ ނޫހުން ބުންޏެވެ. އެކަމަކު މިއާ ބެހޭ އެއްވެސް ވާހަކައެއް އަދި ރަސްމީކޮށް ހިއްސާއެއް ނުކުރެ އެވެ.
ސަންތޯޝީ ޑައިރެކްޓްކުރި ފިލްމަކަށް އާމިރު ކުޅުނު ހަމައެކަނި ފިލްމަކީ މީގެ 30 އަހަރު ކުރިން ރިލީޒްކުރި ކާމިޔާބު އެކްޝަން ކޮމެޑީ "އަންދާޒް އަޕްނާ އަޕްނާ" އެވެ. އޭގެ ކާސްޓްގައި ސަލްމާން ޚާނާއި ކަރިޝްމާ ކަޕޫރާއި ރަވީނާ ޓަންޑަން ވެސް ހިމެނެ އެވެ.
ސަންތޯޝީ ޑައިރެކްޓްކުރާ ދެވަނަ ފިލްމެއް އާމިރު ކުޅެން ނިންމާފައިވާ ކަމަށް ވާހަކަ ދެކެވެން ފެށި އިރު، އާމިރުގެ ކުރިއަށް އޮތް ފިލްމަކީ "ސިތާރޭ ޒަމީން ޕަރް" އެވެ. ޝޫޓިން ނިންމައި ޕޯސްޓް-ޕްރޮޑަކްޝަން މަރުހަލާގައި އޮތް އެ ފިލްމު ޑިސެމްބަރުގައި ރިލީޒްކުރާނެ ކަމަށް މީޑިއާތަކުން ކުރިން ބުނެފައިވެ އެވެ.
އާރްއެސް ޕްރަސައްނާ ޑައިރެކްޓްކޮށްފައިވާ މި ފިލްމަކީ 2018 ގެ ސްޕެއިންގެ ކޮމެޑީ ޑްރާމާ "ޗެމްޕިއަންސް" ރިމޭކެކެވެ. އާމިރު އެންމެ ފަހުން ފެނިފައި ވަނީ 2022 ގެ "ލާލު ސިންގް ޗައްޑާ" އިންނެވެ.