ސިއްހީ ދާއިރާއަށް އިންގިލާބީ ބަދަލެއް ގެންނަން މަސައްކަތްކުރަންޖެހޭ ކަމަށް ފަސްޓް ލޭޑީ ސާޖިދާ މުހައްމަދު މިއަދު ވިދާޅުވެއްޖެ އެވެ.
ބަލިމީހުންގެ ރައްކާތެރިކަމާ ގުޅޭ ބައިނަލްއަގުވާމީ ދުވަސް ފާހަގަކުރުމުގެ ގޮތުން އައްޑޫގައި ބާއްވާ ކޮންފަރެންސް ފެށުމަށް ބޭއްވި ޖަލްސާގައި ވާހަކަފުޅުދައްކަވަމުން ސާޖިދާ ވިދާޅުވީ ބަލިމީހާ އަށް ދެވޭ ފަރުވާގެ ގޮތުންނާއި ދެވޭ ފަރުވާ ބާވަތުން ފުރާނައަށާއި ހަށިގަނޑަށް ބޮޑެތި ގެއްލުންތައް ވެފައި ވުމަކީ ރާއްޖޭގެ ތާރީހުގައި ވެސް އަދި މިހާރުވެސް ބައެއް ފަހަރަށް ތަޖުރިބާ ކުރެވޭ ކަމެއް ކަމަށެވެ.
ހިދުމަތް ދިނުމުގައި ފަރުވާތެރިވެ މިފަދަ ކަންކަން މަދުކުރަން މަސައްކަތް ކުރަންޖެހޭ ކަމަށާއި ގައުމީ ހުރިހާ ލެވެލެއްގައި މި ކަމުގައި މަޝްވަރާކޮށް، އާރުލާ ނިންމުންތަކެއް ނިންމައި ތަންފީޒުކޮށް، ސިއްހީ ދާއިރާ އަށް އިންގިލާބީ ބަދަލެއް ގެންނަން މަސައްކަތް ކުރަންޖެހޭ ކަމަށްވެސް ސާޖިދާ ވިދާޅުވި އެވެ.
އަދި ބަލި މީހުންގެ ސަލާމަތަށްޓަކާ އާ އުސޫލުތަކާއި، އާ ވަސީލަތްތައް ތައާރަފުކޮށް، ފުރިހަމަ އަށް އެކަންކަން ތަންފީޒު ކުރަން ފަށާ ދުވަހަކީ ދިވެހި ސިއްހީ ދާއިރާ އުސްމިންތަކަކަށް ދަތުރުކުރާނެ ދުވަސް ކަމަށްވެސް ވިދާޅުވި އެވެ. އަދި ޑަބްލިއުއެޗްއޯގެ ސްޓްރެޓެޖިކް އެކްޝަން ޕްލޭނާއި އެއްގޮތަށް ރާއްޖޭގެ ހާލަތާއި ވެއްޓަށް ފެތޭގޮތަށް މަސައްކަތް ކުރަންޖެހޭ ކަމަށް ވިދާޅުވި އެވެ.
މީގެއިތުރުން ސާޖިދާ ވަނީ ހިދުމަތުގެ ފެންވަރު ރަނގަޅު ކުރުމުގައި ބަލި މީހާގެ ރައްކާތެރިކަން ނުވަތަ ފަރުވާގެ ސަބަބުން ގެއްލުމެއް ވިޔަ ނުދިނުމުގެ މަތިވެތި މަގުސަދު އަބަދުވެސް އިސްކުރުމަށް ސިއްހީ ހިދުމަތްތެރިންނަށް އިލްތިމާސްކުރައްވާފަ އެވެ.