އިޒްރޭލުން ފާއިތުވި ދެ ހަފްތާތެރޭ ލުބްނާނުގެ އެކި ސަރަހައްދުތަކަށް ދިން ހަމަލާތަކުގައި މަރުވި މީހުންގެ އަދަދު 1،000 އަށް ވުރެ މައްޗަށް އަރައިފި އެވެ.
ލުބްނާނުގެ ހެލްތު މިނިސްޓްރީން މިއަދު އާންމުކުރި މައުލޫމާތުތަކަށް ބަލާއިރު އިޒްރޭލުން މި މަހުގެ 16 އިން 27 ގެ ނިޔަލަށް ދިން ހަމަލާތަކުގައި ވަނީ 1،030 މީހުން މަރުވެފަ އެވެ. މީގެތެރޭގައި 87 ކުޑަކުދިންނާއި 56 އަންހެނުން ހިމެނެ އެވެ. އަދި 6،352 މީހަކަށް އެކިވަރުގެ އަނިޔާތައް ލިބިފައިވާ ކަމަށް މިނިސްޓްރީން ބުނެ އެވެ.
އިޒްރޭލުން ލުބްނާނުގެ ބެއިރޫތަށް އިއްޔެ ދިން ވައިގެ ހަމަލާތަކެއްގައި ވަނީ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އާއި އެ ޖަމާއަތުގެ ލީޑަރުންތަކެއް އަވަހާރަކޮށްލާފަ އެވެ. އިޒްރޭލުން މިއަދުވެސް އަންނަނީ ލުބްނާނުގެ ދެކުނުގެ ސަރަހައްދުތަކަށް ވައިގެ ހަމަލާތައް ދެމުންނެވެ.
ހިޒްބުﷲ އިން ވަނީ ނަސްރުﷲ އަވަހާރަކޮށްލި ނަމަވެސް ފަލަސްތީނުގެ ގާޒާ އާއި ލުބްނާނުގެ ދިފާއުގައި ދުޝްމަނުންނާއި ކުރިމަތިލުމުގައި އެ ޖަމާއަތް ދެމި އޮންނާނެ ކަމަށް ބުނެފަ އެވެ.
އިޒްރޭލުން ދެމުންދާ ހަމަލާތަކުގެ ރައްދުގައި ހިޒްބުﷲ އިން ވެސް އަންނަނީ އިޒްރޭލަށް ވައިގެ ހަމަލާތައް ދެމުންނެވެ.
އިޒްރޭލުން ލުބްނާނަށް ދެމުން އަންނަ ހަމަލާތައް ފާއިތުވި ދެ ހަފްތާތެރޭ އިތުރަށް ވަރުގަދަކުރިއިރު، އެގައުމުން އަންނަނީ ފަލަސްތީނުގެ ގާޒާގައި ވެސް ބޮޑު ގަތުލްއާންމެއް ހިންގަމުންނެވެ. އެ ގަތުލްއާންމުގައި މިހާތަނަށް ގާޒާ އިން ވަނީ 41،000 އަށް ވުރެ ގިނަ މީހުން މަރުވެފަ އެވެ.