ގޭންގް ކުށްތަކާ ދެކޮޅަށް މިއަހަރުގެ ފުރަތަމަ 8 މަސް ދުވަހުގެ ތެރޭގައި ކުރި މަސައްކަތްތަކުގައި 8 މީހަކަށް ދައުވާކޮށް ދޭން އެދި ޕްރޮސެކިއުޓަ ޖެނެރަލް ޕީޖީ) އޮފީހަށް ފޮނުވާފައިވާ ކަމަށް ފުލުހުން ބުނެފި އެވެ.
މި އަހަރުގެ ޖެނުއަރީ 1 އިން އޮގަސްޓް 31 އާ ހަމައަށް ގޭންގް ކުށްތަކާ ދެކޮޅަށް ފުލުހުންގެ ގޭނގް ކްރައިމް އެންފޯސްމަންޓުން ކޮށްފައިވާ މަސައްކަތްތަކުގެ ތަފާތުހިސާބުތައް ދައްކާ ގޮތުން އެ މުއްދަތުގެ ތެރޭގައި 67 މީހަކު ހައްޔަރުކުރި އެވެ. އަދި އޭގެ ތެރެއިން 22 މީހަކު މިހާރު ވެސް ތިބީ ފުލުހުންގެ ބަންދުގަ އެވެ.
އެގޮތުން 15 މީހަކު ރިމާންޑް ޖަލަށް ބަދަލުކޮށްފައިވާއިރު، 30 މީހަކު ވަނީ ބަންދުން ދޫކޮށްލައިފަ އެވެ.
ފުލުހުން ބުނި ގޮތުގައި ފާއިތުވި 8 މަހުގެ ތެރޭގައި ހުއްޓުވައި ސުވާލު ކުރެވުނު މީހުންގެ އަދަދު 12،253 އަށް އަރަ އެވެ. އަދި އޭގެ ތެރޭގައި 18 އަހަރުން ދަށުގެ 331 ކުދިން ހިމެނެ އެވެ.
ފުލުހުން މައުލޫމާތު ދޭ ގޮތުގައި މިހާރު ފަށާފައިވާ މަސައްކަތްތަކުގެ ތެރެއިން މާލެ އާއި ހުޅުމާލޭގައި ގޭންގްތައް ހަރަކާތްތެރިވާ ސަރަހައްދުތަކުގައި ސްޓެޓިކްކޮށް ފުލުހުން ތިބެގެން ބަލަހައްޓަމުން ގެންދާނެއެވެ.