ފާއިތުވި ދެ ދުވަހު ބޯކޮށް ވާރޭ ވެހުމުގެ ސަބަބުން ނޭޕާލުން 100 މީހުން މަރުވެ، 60 އަށް ވުރެ ގިނަ މީހުން ގެއްލިއްޖެ އެވެ.
ބޯކޮށް ވާރޭ ބެހުމުގެ ސަބަބުން ފެންބޮޑުމުގެ އިތުރަށް ބިންގަނޑު ކަނޑައިގެން ދިއުން ފަދަ ހާދިސާތައް ވެސް ހިނގާފައިވެ އެވެ. މިކަމާ ގުޅިގެން އާންމު ދިރިއުޅުމަށް ވެސް ބުރޫ އަރާފައިވާ އިރު، ބައެއް ސްކޫލްތަކާއި ކޮލެޖްތަކާއި ޔުނިވަސިޓީ އިމާރާތްތަކަށް ލިބުނު ގެއްލުންތަކާ ގުޅިގެން، ސްކޫލްތައް ވަނީ ތިން ދުވަހަށް ބަންދުކޮށްފަ އެވެ.
ބޯކޮށް ވާރޭ ވެހުމުގެ ސަބަބުން ނޭޕާލުން 100 މީހުން މަރުވި އިރު، އޭގެ ތެރެއިން 37 މީހުންނަކީ ވެރިރަށް ކަތުމަންޑޫން މަރުވި މީހުންނެވެ. މީޑިއާތަކުން ރިޕޯޓްކޮށްފައިވާ ގޮތުގައި ކަތުމަންޑޫގެ ބައެއް ސަރަހައްދުތަކަށް 322.3 މިލިމީޓަރުގެ ވާރޭ ވެހިފައިވެ އެވެ.
ގެއްލުނު މީހުން ހޯދުމުގެ މަސައްކަތް ކުރަމުން އަންނަ އިރު، މަރުވި މީހުންގެ އަދަދު އަދިވެސް އިތުރުވެދާނެ ކަމަށް ނޭޕާލްގެ ކަމާބެހޭ އޮފިޝަލުން މިއަދު ވިދާޅުވެފައިވެ އެވެ.
ބޯކޮށް ވާރޭ ވެހުމުގެ ސަބަބުން ނޭޕާލްގެ ބައެއް ސަރަހައްދުތަކުގެ ކޯރުތައް ވެސް ފުރި ބަންޑުންވުމުގެ ސަބަބުން ފެންބޮޑުވުމުގެ ހާދިސާތައް އިތުރުވެފައިވެ އެވެ.