އަންނަ އަހަރު ބާއްވާ 97 ވަނަ އޮސްކާ އެވޯޑްސްގެ އެންމެ މޮޅު ބޭރު ފީޗާ ފިލްމު ކެޓަގަރީ އަށް އިނގިރޭސިވިލާތުން ހުށަހަޅާ ފިލްމަކަށް ހިންދީ ފިލްމެއް ހޮވައިފި އެވެ.
އެގޮތުން އެ ގައުމުން ދުނިޔޭގެ އެންމެ ޝަރަފުވެރި ފިލްމު އެވޯޑަށް ފޮނުވަން ނިންމީ އިނގިރޭސިވިލާތާއި އިންޑިއާ އާއި ފްރާންސްގެ އިތުރުން ޖަރުމަންގެ ޕްރޮޑަކްޝަން ހައުސްތަކަކުން ހިއްސާވާ ގޮތަށް އުފެއްދި ހިންދީ ކްރައިމް ޑްރާމާ "ސަންތޯޝް" އެވެ.
މި އަހަރުގެ ކާންސް ފިލްމު ފެސްޓިވަލްގައި ވެސް ޕްރީމިއާކުރި މި ފިލްމަކީ އިންޑިއާ ދަރިކޮޅު އިނގިރޭސި ޑައިރެކްޓަރު ސަދިއާ ސޫރީގެ ލިޔެ، ޑައިރެކްޓްކުރި އޭނަގެ އަލަތު ފީޗާ އެވެ.
ހުވަފަތްވެފައިވާ ޒުވާން އަންހެނަކު އޭނަގެ ބައްޕަ އަދާކުރަމުން ދިޔަ ފުލުހެއްގެ ވަޒީފާއާ ހަވާލުވުމުން ދިމާވާ ހާދިސާތަކެއް ދައްކުވައިދޭ "ސަންތޯޝް" ގެ ޓައިޓްލް ރޯލު ކުޅެފައި ވަނީ ޝަހާނާ ގޮސްވާމީ އެވެ. ފިލްމުގެ އިތުރު ކާސްޓުންގެ ތެރޭގައި ސުނީތާ ރަޖްވާރު، ސަންޖޭ ބިޝްނޯއީ، ކުޝާލް ޑޫބޭ، ނަވަލް ޝުކްލާ އަދި ޕްރަތިބާ އަސްވަތީ އެވެ.
އިންޑިއާ އިން އަންނަ އަހަރުގެ އޮސްކާ އަށް ފޮނުވަން ނިންމި ފިލްމަކީ އާމިރު ޚާންގެ ކުރީގެ އަންހެނުން ކިރަން ރާއޯ ޑައިރެކްޓްކޮށް މި އަހަރުގެ މާޗްގައި ގެނެސްދިން ކޮމެޑީ ޑްރާމާ "ލާޕަތާ ލޭޑީސް" އެވެ.
އަންނަ އަހަރުގެ އޮސްކާ އެވޯޑް ހަފުލާ އޮންނާނީ މާޗް 2 ގަ އެވެ.